भूपी शेरचनबारे छोरीको संस्मरण बजारमा

काठमाडौं । नेपाली कविताका शिखरपुरुष भूपी शेरचनबारे संस्मरण भूपी : छोरीको स्मृतिमा प्रकाशन भएको छ । भूपी शेरचनकी कान्छी छोरी कविता शेरचनले उक्त पुस्तक लेखेकी हुन् । यो पुस्तक भूपी : अ डटर्स मेम्वाएरको नेपाली अनुवाद हो ।  

आधुनिक नेपाली कविताका सर्वोच्च शिखर कवि भूपी आज पनि उत्तिकै आदरपूर्वक पढिन्छन् । कवितामा मानवीय संवेदनाको सार पर्गेल्दै सामाजिक न्यायको पक्षपोषण गर्ने उनको जीवन भने विरोधाभास र रहस्यमै बित्यो । कम्युनिस्ट आदर्श अँगालेका उनले विलासी र रवाफिलो जीवनशैली अपनाए । तर यही विरोधाभासका कारण उनी सिर्जनाभन्दा बढी किस्साहरूमा बाँच्नुप-यो ।

लेखक कविता भन्छिन्, ‘कवि भूपी शेरचनबारे मैले अनेकौं किस्सा सुनेकी छु । केही सत्य तर धेरै कपोलकल्पित ! तिनै किस्साहरूलाई मैले पुस्तकमार्फत रहस्योद्घाटन गर्ने प्रयास गरेको छु ।’

उनी थप्छिन्, ‘सम्पन्न परिवारमा जन्मेर पनि बुबाले किन साम्यवादी दर्शन अँगाल्नुभयो ? सर्वहारा कवि कालान्तरमा कसरी राजावादी बन्न पुग्नुभयो ? साथीभाइ र परिवारसँग उहाँको सम्बन्ध कस्तो थियो ? यस्ता प्रश्नको उत्तर दिँदै उहाँका जीवनका विभिन्न पाटा केलाउने र पाठकसमक्ष ल्याउने मेरो प्रयास यो पुस्तक ।’

नयाँ नेपाली पाठकलाई नेपाली साहित्यका महान् व्यक्तित्वबारे जानकारी गराउने र उनीहरूमा हाम्रा साहित्यिक सम्पदाप्रति श्रद्धा जगाउने प्रयासस्वरुप शृङ्खलाबद्ध रूपमा आफूहरूले ती व्यक्तित्वहरूबारे संस्मरण एवम् जीवनी प्रकाशन गर्दै आएको प्रकाशक फाइनप्रिन्टका प्रमुख कार्यकारी अधिकृत (सिईओ) नीरज भारीले बताए । ‘त्यही शृङ्खलाअन्तर्गत हामीले भूपी : छोरीको स्मृतिमा प्रकाशन गरेका हौं । यसअघि हामीले गोविन्द गिरी प्रेरणाले लेखेको पारिजातको जीवनी सुश्री पारिजात र लक्ष्मीप्रसाद देवकोटाबारे छोरा पद्म देवकोटाले लेखेको संस्मरण सम्झनामा बुबा लक्ष्मीप्रसाद देवकोटा प्रकाशन गरेका छौं ।’  

भूपी : छोरीको स्मृतिमामा कविताले बुबा भूपीसँगको भावनात्मक सम्बन्ध, उनीबारे चलेका हल्ला र व्यक्तित्व निर्माणका कारक केलाएकी छिन् । सँगसँगै धनाढ्य पिताका सर्वहारा कविदेखि समाजवादी कवि भूपी शेरचनसम्मको यात्रा पनि वर्णन गरेकी छिन् । यो किताब छोरीको स्मृति मात्रै होइन, भूपीसँग सम्बन्धित प्रश्नहरूको एकमुष्ट जवाफ र शेष शङ्काहरूको भद्र स्पष्टीकरण पनि हो । 

भूपीलाई सबभन्दा नजिकबाट चियाउन सहयोग गर्ने यस किताबले बाहिर चम्किलो र आकर्षक तर भित्र अथाह पीडा बोकेका कवि भूपीको अन्तरङ्ग चित्रमाथि प्रकाश पार्छ ।