कहाँ छन् दुर्गा प्रसाई ?

काठमाडौँ । काठमाडौंको तीनकुने क्षेत्रमा राजावादीको प्रदर्शनका क्रममा गाडी चलाएर प्रहरीलाई पेल्दै हिंसा भड्काउन उक्साएका दुर्गा प्रसाईं शुक्रबार दिउसोदेखि फरार छन् । 

हिंसात्मक घटनाका मुख्य नाइके प्रसाईं नै रहेको निष्कर्ष निकाल्दै मन्त्रिपरिषद्ले शुक्रबार नै तत्काल पक्राउ गर्न गृह प्रशासनलाई निर्देशन दिएको थियो । प्रहरीले पक्राउको प्रयाश गरे पनि अहिलेसम्म नभेटिएको जनाएको छ ।

राजावादीको प्रदर्शन भड्किँदा एक सञ्चारकर्मीको आगजनीमा परेर र एक सर्वसाधारणको गोली लागेर मृत्यु भएको छ । प्रदर्शनकारीले सार्वजनिक, निजी घर तथा कार्यालय, व्यापारिक कम्प्लेक्स, सवारीसाधनमा तोडफोड, आगजनी, लुटपाट गरेको थियो । प्रदर्शनका योजनाकार पूर्वराजा ज्ञानेन्द्र शाह भए पनि प्रसाईंकै कारण राजावादी समूह अराजक बनेको मन्त्रिपरिषद्को निष्कर्ष छ । प्रसाईं राजावादी आन्दोलनका कमान्डर हुन् ।

प्रसाईं शुक्रबार कोटेश्वरतर्फबाट आफ्नै गाडी चलाएर हिँडेका थिए । शान्तिनगरको पुल कटेपछि गाडीबाट ओर्लिएर उनी नजिकै एक घरको सटरभित्र लुके । राजावादी जत्थाले अन्धाधुन्ध आगजनी, लुटपाट र तोडफोड गर्न थालेपछि प्रहरी शक्ति त्यसलाई नियन्त्रण गर्न केन्द्रित भएको मौका छोपेरप्रसाईं करिब साढे ४ बजेतिर सटरबाट निस्केर भागेका थिए । 

प्रसाईं नरेफाँट हुँदै भागेर लुभु र इमाडोलको बीचमा रहेको धर्मगुरु पुष्कर खतिवडाको घर पुगेका थिए । १५ मिनेटजति त्यही बसेका प्रसाईले प्रहरीले जहाँ बोलायो त्यही आउछु भन्ने भाषामा सामाजिक सञ्जाल फेशबुकमा लेखे र त्यसपछि मोबाइल स्वीचअफ गरे । 

विवादास्पद पृष्ठभूमिका प्रसाईं यसअघि विभिन्न कसुरमा पटक–पटक पक्राउ परेर छुटेका व्यक्ति हुन् । साइबर अपराध र गाली बेइज्जतीसम्बन्धी कसुरमा गत ६ असोजमा पक्राउ परेका उनी जिल्ला अदालत काठमाडौंको आदेशबमोजिम १५ असोजमा धरौटी बुझाएर छुटेका थिए । मुद्दा अदालतमा विचाराधीन रहेकै अवस्थामा प्रसाईं संगठित अपराध, किर्ते, मानहानिलगायतका कसुरमा ४ मंसिरमा फेरि पक्राउ परेका थिए । त्यति बेला उनी बन्दीप्रत्यक्षीकरणको निवेदन दिएर सर्वोच्च अदालतको आदेशबाट करिब एक महिनापछि छुटेका थिए ।