विष्णु रिमालले बालेनको प्रसंसा गर्दै भने ‘यो शक्ति गणतन्त्रले दिन्छ’

काठमाडौं । नेकपा एमालेमा उपमहासचिव एवं प्रधानमन्त्री केपी शर्मा ओलीका प्रमुख राजनीतिक सल्लाहकार विष्णु रिमालले काठमाडौं महानगरपालिकाका मेयर बालेन शाहको प्रसंसा गरेका छन् ।

पूर्व राजा ज्ञानेन्द्र शाहलाई महानगरपालिकाले पत्र काटेको सन्दर्भमा सामाजिक सञ्जाल फेशबुकमा लेख्दै भनेका छन् ‘गणतन्त्रमा मात्र यस्तो सम्भव छ । महोत्तरीको एउटा सामान्य गाउँले परिवारका बालेन्द्र साहले काठमाडौंका सम्भ्रान्त परिवारका सयौं वर्ष अधिनायकी शासन सञ्चालन गर्ने शासक ज्ञानेन्द्र शाहलाई जरिवानाको पत्र काटेछन् ।’ उनले भनेका छन् ‘यो शक्ति दिन सक्ने व्यवस्थाको नाम गणतन्त्र हो ।’

शुक्रबार काठमाडौंमा राजवादी समुहले गरेको प्रदर्शनका क्रममा विभिन्न शीर्षकमा पूर्व राजा ज्ञानेन्द्र शाहको नाममा ७ लाख ९३ हजार जरिवाना तिराउने भएको छ ।

पछिल्लो समय प्रधानमन्त्री ओली र बालेनको सम्बन्ध राम्रो छैन । कतिपय एमाले कार्यकर्ताले बालेनलाई राजावादी भन्ने आरोप लगाइरहेको बेला बालेनले पूर्व राजालाई नै पत्र काटेर एमालेलाई समेत दवाव दिएका छन् । एमालेले दरवार मार्गमा कन्सर्ट गर्दा पनि सडक फोहोर गरेको भन्दै महानगरपालिकाले पत्र काटेको थियो तर, एमालेले अहिलेसम्म पैसा तिरेको छैन ।

राजवादी आन्दोलनका कमाण्डर दुर्गा प्रसाई कुनै बेला ओलीका प्रिय पात्र हुन् । चितवनमा भएको १० औं महाधिवेशनमा ओलीले कार्यकर्ताको भावना विपरित प्रसाईलाई केन्द्रिय सदस्य बनाएका थिए ।