राजवादीकाे आन्दोलनमा पक्राउ परेका ७१ जनाको आज म्याद थपिँदै

काठमाडौँ । शुक्रबार गरिएको हिंसात्मक प्रदर्शनमा सहभागी भएको आरोपमा ७१ पक्राउ परेका छन् । पक्राउ परेका १ सय ११ जना मध्ये ४० जनालाई प्रहरीले सोधपुछपछि छाडेको छ ।

अनुसन्धानका लागि हिरासतमा लिईको ७१ जनालाई आइतबार जिल्ला अदालत काठमाडौंबाट म्याद थप गरेर अनुसन्धान अघि बढाइने भएको छ ।

जिल्ला प्रहरी परिसर काठमाडौंका प्रहरी उपरीक्षक अपिलराज बोहराका अनुसार हिंसात्मक प्रदर्शनमा संलग्नमध्ये शुक्रबार १ सय ५ र शनिबार थप ६ जनालाई पक्राउ परेका थिए । पक्राउ परेकामध्ये ४० जनालाई भने सामान्य सोधपुछपछि शनिबार छाडिएको छ ।

१ सय २८ घाइते

दुई जनाको ज्यान जाने गरी भएको राजावादीहरूको हिंसात्मक प्रदर्शनका क्रममा ५५ प्रहरी, २२ सशस्त्र प्रहरी र ५१ जना प्रदर्शनकारीसहित १ सय २८ जना घाइते भएका थिए । घाइतेमध्ये ५ प्रहरी, १ सशस्त्र प्रहरी र १६ प्रदर्शनकारीको उपचार भइरहेको छ ।

आन्दोलन हिंसात्मक बनाउन उक्साएको भन्दै प्रहरीले राप्रपाका उपाध्यक्ष रवीन्द्र मिश्र, राप्रपा सांसद धवलशमशेर राणा, राजावादी अभियानमा संलग्न अधिवक्ता स्वागत नेपाल, दुर्गा प्रसाईंका सहयोगी मुनिन्द्रराज भण्डारी, पशुपति खड्का, मनीषजंग शाही, सेफोर्ड लिम्बू र सन्तोष तामाङलगायतलाई पक्राउ गरेको हो । 

१८ भवनमा तोडफोड

प्रहरी परिसर काठमाडौंले प्रदर्शनका क्रममा आन्दोलनकारीले निजी तथा सरकारी गरी १८ वटा भवन तोडफोड र आगजनी गरेको जनाएको । तीनकुने, कोटेश्वर, नरेफाँट, सुविधानगर, जडीबुटी, सुविधानगर, आलोकनगर र गौरीगाउँ क्षेत्रका गरी साढे तीन दर्जन बढी पसल, संघसंस्था र कार्यालयमा क्षति पुगेको प्रहरीले जनाएको छ । 

राजावादी प्रदर्शनकारीले कोटेश्वरस्थित भाटभटेनीमा तोडफोड तथा लुटपाट गर्नुका साथै विभिन्न १२ स्थानमा आगजनी गरेको प्रहरीले जनाएको छ । हिंसात्मक जत्थाले २५ वटा गाडीमा पूर्ण क्षति पु¥याउनुका साथै १४ वटा गाडीमा आंशिक क्षति पु¥याएको प्रहरीले जनाएको छ । उनीहरूले प्रहरीका ६ वटा गाडी पनि तोडफोड गरेका छन् । जडीबुटी उत्पादन तथा प्रशोधन कम्पनीको परिसरभित्र मात्र १३ वटा गाडी पूर्ण रूपमा जलेका छन् भने ४ वटा मोटरसाइकल र २ वटा स्कुटरमा पनि आगो लगाइएको थियो । त्यस्तै काठमाडौं महानगरको दुईवटा दमकलमा पनि ढुंगामुढा गरेर क्षति पु¥याइएको प्रहरीले जनाएको छ ।

तीनकुनेको सुनौलो बचत तथा सहकारीको भवनमा पनि राजावादीले आगजनी गर्दा पूर्ण रूपमा जलेर नष्ट भएको छ । उक्त भवनमा लागेको आगो सँगैको अर्को घरमा समेत सल्किएर क्षति पुगेको छ । तीनकुने सुविधानगरको राज भवनमा रहेका ६ निजी संस्था, प्रभु कम्प्लेक्समा रहेका ३ निजी संस्था, एकीकृत समाजवादीको केन्द्रीय कार्यालय, जडीबुटी उत्पादन तथा प्रशोधन केन्द्र र प्रहरीका ३ कार्यालयमा पनि आगजनी तथा तोडफोड गरिएको छ ।