ट्रम्पकाे विराेध गरेपछि सेलेनालाई अनफलाे गर्ने बढे

एजेन्सी । अमेरिकी राष्ट्रपति डाेनाल्ड ट्रम्पकाे विराेध गरेकै कारण अमेरिकी गायिका सेलेना गोमेजको इन्स्टाग्राम अकाउन्टमा फलाेअर्स घट्नेक्रम सुरु भएकाे छ । दुई सातामा सात लाख फलोअर्स घटेकाे विभिन्न सञ्चारमाध्यमले उल्लेख गरेकाे छ। अमेरिकी राष्ट्रपति डोनाल्ड ट्रम्पले गैरकानुनी आप्रवासीमाथिको कारवाहीलाई तीव्र तुल्याएपछि केही दिनअघि सेलेनाले ट्रम्पको विरोध गर्दै इन्स्टाग्राममा एक भिडियो पोष्ट गरेकी थिइन्।

सेलेनाले ट्रम्पको यो कार्यका कारण आफ्ना साथीहरूमाथि आक्रमण भइरहेको भन्दै दुःख व्यक्त गरेकी थिइन्। उनले रुँदै ‘मेरा सबै मानिसमाथि आक्रमण भइरहेको छ र त्यसमा बालबालिकालाई समेत छन्। म धेरै दुःखी छु, म केही गर्न चाहन्छु, तर सक्दिन। के गर्ने पनि थाहा छैन। तर म सक्दो प्रयास गर्ने प्रतिज्ञा गर्छु’ भनेकी थिइन्। सो भिडियो उनले हटाइसकेकी छन्। मेक्सिकन झण्डाको इमोजी र मलाई माफ गर्नुहोस् शीर्षकमा राखिएको सो भिडियो निकै भाइरल भएको थियो।

सेलेनाले सन् २०१९ मा टाइम म्यागजिनको लेखमा आफ्नो व्यक्तिगत जीवनका बारेमा खुलासा गर्दै आफू अमेरिका–मेक्सिको सीमा पार गर्ने परिवारको पहिलो सदस्य रहेको बताएकी थिइन्। अमेरिका र मेक्सिकोको सीमा क्षेत्रबारे बारम्बार विवाद भइरहन्छ।

राष्ट्रपतीय चुनावका बेला रिपब्लिकन पार्टीका उम्मेदवार ट्रम्पले आफू जितेमा अमेरिकामा रहेका गैरकानुनी आप्रवासीविरुद्ध कारबाही गर्ने प्रतिवद्धता जनाएका थिए। अहिले केही व्यक्ति पक्राउ समेत परिसकेका छन् ।

अहिले सेलेनाकाे फलोअर्स ४ सय २२ मिलियन रहेका छन्।