रिंकु सदा बलात्कार प्रकरण : घटना दबाउन पञ्चायती बस्नेहरु फरार

सिरहा । जिल्लाको नवराजपुर गाउँपालिका–१ भगवतीपुर तामासुइया टोलकी १७ वर्षीया किशोरी रिंकुकुमारी सदाको सामूहिक बलात्कार र रहस्यमय मृत्युका सन्दर्भमा प्रहरीले अहिलेसम्म कसैलाई पनि पक्राउ गर्न सकेको छैन । घटनाको विषयमा जानकारी लिन पुगेका पूर्वगृह राज्यमन्त्री तथा नेपाल संघीय समाजवादी पार्टीका अध्यक्ष रिजवान अन्सारीको नेतृत्वले पीडितको परिवारसँग भेट गर्दै यथासम्म अभियुक्तलाई पक्राउ गर्न आग्रह गरेका छन् । घटनालाई टालटुल गर्न खोजे आन्दोलन गर्न समेत पछि नपर्ने बताए ।

दलित समुदाय माथि दिनदिनै हिंसा बढिरहेको भन्दै पूर्वगृह राज्यमन्त्री अन्सारीले पीडित परिवार र समुदायलाई कसैको पनि प्रलोभनमा नपर्न आग्रह गरेका थिए ।

‘यदि घटनामा संलग्नलाई जोगाउने काम कसैले ग-यो भने हामी आन्दोलन गर्ने छौं ।’ उनले भने ।

तीन वर्षमा ४० प्रतिशत हिंसा

नेपाल मानव अधिकार आयोगको २०८० को प्रतिवेदन अनुसार, दलित समुदाय विरुद्धको हिंसा पछिल्लो ३ वर्षमा ४० प्रतिशतले बढेको छ । यस्तो अवस्थामा, संविधानले गरिएको जातीय भेदभाव विरुद्धको कानूनको कार्यान्वयन निकै चुनौतीपूर्ण रहेको छ ।

पीडित परिवारलाई भेट्न मधेश प्रदेश सरकारको पूर्वगृह संचार तथा कानून मन्त्री तथा मधेश प्रदेश सभा सदस्य विमला अन्सारीले रिंकुको साथमा जे भयो त्यो आफुले महसुस गरिरहेको अनुभव गरेको बताइन् । 

केही दिन अगाडि सर्लाहीका सत्येन्द्र राम र नेहा गुप्ताको अन्तरजातीय बिहे भएपछि पदीय दुरुपयोग गरि बहालबाला गृह मन्त्रीको निर्देशनमा नै प्रहरी महनिरीक्षकले डिएसपी र प्रहरी हवल्दार नै खटाएर पक्राउ गर्न निर्देशन दिएका थिए । रिंकु घटनामा पनि  प्रहरीले अहिलेसम्म संलग्न कसैलाई पनि पक्राउ गर्न नसक्नुलाई प्रहरीको जिम्मेवारी माथी प्रश्न चिन्ह खडा भएको वहुजन एकता पार्टी नेपालको वरिष्ठ नेता राजाराम पासवानले आक्रोश व्यक्त गरे ।

उनले ईलाका प्रहरी कार्यालय लहानका प्रमुख डिएसपी विष्णु प्रसाद सोतीलाई प्रत्यक्ष भेटेर घटनालाई गम्भीर रूपमा हेर्न आग्रह गरेका थिए ।

साथै उनले यस्ता घटनाहरू हुनु भनेको सम्पूर्ण दलित समुदाय माथिको हिंसा रहेको बताएका थिए । समयमा नै पीडितले न्याय नपाए सडक देखि सदनसम्म अवरुद्ध हुने बताए ।

बहुजन एकता पार्टी नेपालको अध्यक्ष हरिनन्दन अम्बेडकर, प्रकाश मेहरा केन्द्रिय सह महासचिव, नेपाल जनजागृती पार्टीको अध्यक्ष धुर्वलाल प्रसाद सहनी निषाद र महासचिव भुजेन्द्र पसाद सहनी नेपाल सद्भावना पार्टीका अध्यक्ष रामकुमार महतोले सबैले एकमुष्ट पीडित परिवारको साथमा आफुहरू जति बेला पनि कुनै ठाउँमा उभिन तयार रहेको बताएका छन् ।

दलित अभियन्ता राम सुफल सदाले अहिलेसम्म अभियुक्त पक्राउ नपरेकोमा आक्रोसित छन् ‘चुनावको बेला भोट माग्न भोटरको खेत खलियान , माइत र ससुराली सम्म पुग्ने नेताहरु रिन्कुको मृत्यु प्रकरणमा छानबिनको लागि माग नगर्नुलाइ के भन्ने ?’ उनले सामाजिक सञ्जाल फेशबुकमा लेखेका छन् । 

घटना यसरी घटेको थियो 

आमा सीतादेवी र भाइ भुलासँग बस्दै आएकी रिंकु २६ माघको राति करिब ९ बजेतिर शौच गर्न भनेर बाहिर निस्केकी थिइन् । तर ६ घण्टासम्म घर फर्किनन् । उनी २७ माघ बिहानीपख ३ बजेतिर रोइरहेको अवस्थामा घरबाहिर फेला परिन् ।

६ घण्टा बेपत्ता भएर घर फर्केपछि उनले परिवारलाई आफूमाथि सामूहिक बलात्कार भएको बताएकी थिइन् । परिवारका सदस्यका अनुसार रिंकुले आफूलाई स्थानीय रुपेश मण्डल, टिंकु मण्डल र चन्दन साहेलाले बलात्कार गरेको जानकारी गराएकी थिइन् । ‘शौच गर्न गएका बेला तीन जनाले उठाएर बाँसघारीमा लगेर सामूहिक बलात्कार गरे,’ रिंकुले त्यसबेला भनेको उनका परिवारका सदस्य बताउँछन् ।

आफूमाथि बलात्कार भएको बताएकी दलित समुदायकी रिंकु टिनले छाएको आफ्नै ‘भुईं घर’ मा झुन्डिएको अवस्थामा ३० माघको राति ७ः२० मा मृत भेटिएकी थिइन् । सलले घाँटीमा पासो लगाएको अवस्थामा उनको शव फेला परेको थियो ।

मृत्यु हुनुअघि रिंकुले आफूमाथि सामूहिक बलात्कार भएको बताएपछि घटना सामसुम पार्न गाउँमै पञ्चायती सभा समेत बसेको थियो । घटना दबाउन २९ माघमा गाउँमा पञ्चायती बसेको थियो । पञ्चायती बसेको विषय पुष्टि भएको जिल्ला प्रहरी कार्यालय सिरहाका डीएसपी वीरेन्द्रकुमारले बताए । तर रकमको लेनदेन भएको विषय भने अनुसन्धानकै क्रममा रहेको उनले बताए ।

अहिले घटना दबाउनका लागि पञ्चायती बस्नेहरू अधिकांशजसो फरार भएका छन् । घटनास्थल पुगेको एसएसपी कोइरालाको टोलीले यसबारे अनुसन्धान गरिरहेको जनाएको छ ।