काठमाडौं महानगरमा लफडा- सुनिताको प्रश्नले हच्किएर राजु पाण्डेले दिए चाबी

काठमाडौं । बिहीबार काठमाडौं महानगरपालिकाकाे कार्यालयको दृश्य अन्य दिनको भन्दा फरक थियो । 

महानगरपालिकाका मेयर बालेन शाहले कारबाही गरेका प्रमुख प्रशासकिय अधिकृत सरोज गुरागाईंलाई कर्मचारीले हाजिर गराउन खोज्दा कार्यालयमा तनावको स्थिति देखियो । 

तनाव यसकारण कि कर्मचारी एवं बहुसंख्यक कार्यपालिका सदस्य गुरागाईंलाई हाजिर गराउन चाहन्थे तर, उनको कार्यकक्षमा ताला लगाइएको थियो ।

जब कर्मचारी र जनप्रतिनिधिको साथमा गुरागाईं कार्यकक्षमा पुगे, नगर प्रहरी प्रमुख राजु पाण्डेको निर्देशनमा नगर प्रहरीले उनको कार्यकक्षमा ताला लगाइसकेको थियो ।

उपप्रमुख सुनिता डंगोलले पाण्डेलाई प्रश्न गरिन्- ‘यो कसको आदेशमा लगाएको ?’ पाण्डेले मेयरको आदेशमा भनेर जवाफ दिएलगत्तै अर्को प्रश्न गरिन्- 'लिखित कि मौखिक ?'

अनि पाण्डे हच्किएर गोलमोटल जवाफ दिँदै थिए । त्यहीबेला कर्मचारीले ढोका फुटाउने प्रयास गरे । अन्तिममा पाण्डेले चाबी दिए ।

प्रमुख प्रशासकीय अधिकृत गुरागाईंले एक सय तीन दिनपछि कार्यालय पुगेर हाजिर गरेका हुन् ।

उनले हाजिर गरेलगत्तै उपप्रमुख डंगोलको नेतृत्वमा बैठक पनि बस्यो । अहिले गुरागाईं महानगरकै गाडी चढेर मन्त्रालय गएका छन् ।