काठमाडौँका ५ ठाउँमा दुई महिनासम्मका लागि निषेधाज्ञा जारी

काठमाडौं। काठमाडौँका विभिन्न क्षेत्रमा दुई महिनासम्मका लागि निषेधाज्ञा जारी गरिएको छ।

जिल्ला प्रशासन कार्यालय, काठमाडौँले आइतबार (फागुन २५) देखि लागू हुने गरी निषेधाज्ञा जारी गरेको हो।

शितल निवास (राष्ट्रपति कार्यालय) महाराजगंज, हरित गृह (उपराष्ट्रपति कार्यालय) लैनचौर, सिंहदरबार, प्रधानमन्त्री निवास बालुवाटार र संसद् भवन नयाँ बानेश्वर क्षेत्रमा निषेधाज्ञा जारी गरिएकाे प्रमुख जिल्ला अधिकारी ऋषिराम तिवारीले विज्ञप्तिमार्फत जानकारी दिए।

उक्त क्षेत्रमा दुई महिनासम्म पाँच जनाभन्दा बढी व्यक्ति भेला जम्मा भई अनसन, धर्ना, घेराउ, जुलुस, प्रदर्शन तथा सभजस्ता विरोधका कार्यक्रम गर्न निषेध गरिएकाे छ।

कार्यपालिका, व्यवस्थापिका र न्यायपालिकाका कार्यालय, अति विशिष्ट व्यक्तिहरुको निवास तथा मुख्य प्रशासनिक केन्द्र र सो आसपासका क्षेत्रमा धर्ना, घेराउ, जुलुस, प्रदर्शनजस्ता विरोधका कार्यक्रमहरू गर्दा उत्तेजित भीडबाट तोडफोड, आगजनी जस्ता उश्रृंखल तथा अवाञ्छित गतिविधि हुन सक्ने र आपसी मुठभेड, भिडन्त एवम् हुलदङ्गा वा अशान्ति भई अत्यावश्यक सेवा, सार्वजनिक सेवा प्रवाह, सार्वजनिक यातायात, सार्वजनिक सम्पत्ति र समग्र शान्ति सुरक्षामा गम्भीर असर पर्ने भएका निषेधाज्ञा जारी गरिएको जिल्ला प्रशासन कार्यालयले जनाएकाे छ।