प्रकाश भुजेलले चलाएकाे कारकाे ठक्करबाट घाइते माेटरसाइकल चालककाे मृत्यु

काठमाण्डाै, २९ कार्तिक ।  झाँक्री प्रकाश भुजेलले चलाएको कारको ठक्करबाट घाइते भएका मोटरसाइकल चालकको मृत्यु भएको छ। 

बुधबार दिउँसो शंखरापुर नगरपालिका ९ स्थित साँखु-थली सडकखण्डमा उनले चलाएको कारको ठक्करबाट मोटरसाइकलमा सवार २ जना गम्भीर घाइते भएका थिए।

घाइते मध्ये काठमाडौँ कागेश्वरी मनोहरा नगरपालिका २ आलापोटका अन्दाजी ३८ वर्षीय नारायण नगरकोटीको मृत्यु भएको काठमाडौं प्रहरी परिसरले जानकारी दिएको छ। 

मोटरसाइकलमा पछाडि बसेकी उनकी श्रीमती अन्दाजी ३२ वर्षीया किसानुमाया नगरकोटी गम्भीर घाइते भएकी छन्। उनकाे ग्राण्डी अस्पतालमा उपचार जारी छ ।

थलीबाट साँखुतर्फ आउँदै गरेको प्रकाश भुजेलले चलाएको बा १९ च २६९५नम्बरको कारले सोही दिशातर्फ आउँदै बा प्र ०२–०१८ प ६८७५ नं को मोटरसाइकललाई ठक्कर दिएको थियो। 

दुर्घटनापछि झाँक्री भुजेल कार घटनास्थलमै छाडेर फरार भएका थिए। पछि उनले प्रहरीमा आत्मसमर्पण गरेका थिए । उनलाई प्रहरी वृत्त बौद्धको हिरासतमा राखेर अनुसन्धान भइरहेकाे प्रहरीले जनाएकाे छ ।