नायिकाको मृत्यु भएको २२ वर्षपछि हत्या भएको भन्दै उजुरी

मुम्बई । दक्षिण भारतीय नायिका सौन्दर्याको मृत्यु भएको २२ वर्षपछि उनको मृत्यु स्वभाविक नभएर हत्या भएको खुलासा भएको छ ।

भारतको खम्मम जिल्लाका चिट्टीमल्लु नाम गरेका एक व्यक्तिले नायिकाको हत्या भएको भन्दै प्रहरीमा उजुरी समेत दर्ता गराएका छन् । उनले मोहन बाबुले जग्गा हडप्नकै लागि उनको हत्या गरेको आरोप लगाएका छन् । उनले यो पनि भनेका छन् ‘सौन्दर्याको हत्या गरेर मोहन बाबुले उनको सम्पत्ति हडपेका छन् । यो सम्पत्ति सरकारले लिएर अनाथालयलाई दिइयोस् ।’

उजुरीमा उल्लेख भए अनुसार हैदराबादको जलपल्ली क्षेत्रमा सौन्दर्याको ६ एकड जमिन थियो । सोही जग्गाको विषयमा मोहनबाबु र सौन्दर्याका परिवारबीच विवाद पनि थियो ।

१७ अप्रिल, सन २००४ मा सौन्दर्या भाजपा एवं तेलुगु देशम पार्टीको चुनाव प्रचार गर्न गएकी थिइन् । उनको निजी एअरक्राफ्ट टेकअप हुने बित्तिकै दुर्घटनामा परेको थियो । सोही दुर्घटनामा सौन्दर्याको मृत्यु भएको थियो । भारतीयमा मिडियामा उल्लेख भए अनुसार त्यतीबेला सौन्दर्या तीन महिनाको गर्भवती थिइन् । उनको शव परिवारका सदस्यलाई समेत नदिइ अन्तिम संस्कार गरिएको थियो ।