उनकाे स्वीटर उत्कृष्ट चलचित्र

काठमाडौं । नवीन चाैहान निर्देशित चलचित्र उनकाे स्वीटरले उत्कृष्ठ चलचित्र पुरस्कार जितेकाे छ ।

राष्ट्रपति भवन शीतल निवासमा शुक्रबार आयोजित एक विशेष समारोहबीच ‘राष्ट्रिय चलचित्र पुरस्कार २०८३’ वितरण गरिएको छ । समारोहमा नेपाली चलचित्र क्षेत्रका विभिन्न विधामा उत्कृष्ट योगदान पुर्‍याउने स्रष्टा र कलाकारहरूलाई सम्मानित गरियो ।

यस वर्षको ‘दीर्घ साधना सम्मान’ वरिष्ठ अभिनेता मदनकृष्ण श्रेष्ठलाई प्रदान गरिएको छ। चलचित्र क्षेत्रमा दशकौँदेखि पुर्‍याएको अतुलनीय योगदानको कदर गर्दै उनलाई नगद ३ लाख ७५ हजार रुपैयाँसहित सम्मान गरिएको हो ।

चलचित्र ‘उनको स्वीटर’ ले उत्कृष्ट चलचित्रको उपाधि जित्यो भने सोही चलचित्रबाट नवीन चौहान उत्कृष्ट निर्देशक र मिरुना मगर उत्कृष्ट अभिनेत्री घोषित भए। उत्कृष्ट अभिनेताको पुरस्कार भने चलचित्र ‘परान’बाट वरिष्ठ अभिनेता नीर शाहले पाए ।

चलचित्र ‘परान’का लागि दिपकप्रसाद आचार्य र यम थापाले उत्कृष्ट लेखकको पुरस्कार प्राप्त गरे । प्राविधिक विधातर्फ ‘कोशेढुंगा’का बाबु श्रेष्ठले उत्कृष्ट छायाङ्कन र नहकुल खड्काले उत्कृष्ट सम्पादनको पुरस्कार पाए । नेपाल भाषाको चलचित्र ‘इन्दिरा धिमे मैचा’ले उत्कृष्ट आदिवासी चलचित्रको अवार्ड पायो ।

त्यस्तै, ‘जुरी प्रोत्साहन’ पुरस्कार आना शर्मा (रमिताको पिरती) र बिमोचन दवाडी (झरीपछीको इन्द्रेणी) लाई प्रदान गरियो । ज्योतिराज राईको चलचित्र ‘नाक्छोङ’ ले विशेष चलचित्र पुरस्कार प्राप्त गरेकाे छ।

समारोहमा चलचित्र क्षेत्रका विभिन्न व्यक्तित्वहरूलाई विशेष सम्मान समेत प्रदान गरिएको थियो । सम्मानित हुनेहरूमा चलचित्र प्रदर्शक विष्णु गोपाल श्रेष्ठ, अभिनेत्री मेनुका प्रधान, निर्माता डा. सिंह गुरुङ, पत्रकार प्रकाश सुवेदी, निर्देशक अभिनाश विक्रम शाह, अभिनेता रोहित रुम्बा, अभिनेत्रीहरू एञ्जिला सुब्बा र लक्ष्मी बर्देवा, निर्माता बिनोद सेरचन र प्रोडक्सन म्यानेजर शङ्कर पाण्डे रहेका छन् । स्वर्गीय पत्रकार दिनेश सिटौलालाई मरणोपरान्त ५० हजार नगदसहित सम्मान गरियो ।