बालेनलाई उपमेयर डंगोलकाे चेतावनी- बन्द कोठामा बसेर हुँदैन, अगाडि आउनुपर्छ

काठमाडौं । काठमाडौं महानगरपालिकाकी उपमेयर सुनिता डंगोलले प्रमुख प्रशासकीय अघिकृत सराेज गुरागाईं दोषी देखिए कारबाही हुनुपर्ने बताएकी छिन् ।

बिहीबार कर्मचारीको बलमा गुरागाईंलाई कार्यालय प्रवेश गराएपछि सञ्चार माध्यमलाई प्रतिक्रिया दिँदै उनले गुरागाईं दोषी देखिए कार्वाही गर्नुपर्ने अन्यथा हाजिर गर्न दिनुपर्ने धारणा राखेकी छिन् ।

प्रमुख प्रशासकीय अधिकृत नहुँदा काठमाडौंवासी र कर्मचारीले तनाव झेल्न बाध्य भएको भन्दै उनले महानगर प्रमुख बालेन शाहलाई पनि चेतावनी दिइन् । ‘यदि प्रमुख प्रशासकीय अधिकृतलाई हाजिर नगराउने मेयरको आदेश हो भने मेयर अगाडि आउनुपर्छ । बन्द कोठामा बसेर आदेश दिन पाइँदैन’, उनले भनिन् ।

काठमाडौं महानगरका प्रमुख प्रशासकीय अधिकृत गुरागाईं ३ महिना १४ दिनपछि आज कार्यालय प्रवेश गरेका छन् ।

संघीय मामिला तथा सामान्य प्रशासन मन्त्रालयले गुरागाईंलाई काठमाडौं महानगरपालिकामै हाजिर गर्ने वातावरण बनाइदिनु भन्दै एक महिनाअघि पत्र पठाएको थियो । तर, महानगरपालिकाले उनलाई हाजिर गराएको थिएन ।

तर बिहीबार महानगर प्रहरीको अवरोधका बीच उपमेयर सुनिता डंगोल, कार्यपालिका सदस्य, वडाध्यक्षहरू र कर्मचारीहरूको सहयोगमा गुरागाईंले कार्यालय प्रवेश गरेर हाजिर गरे । अहिले उपमेयर डंगोलको अध्यक्षतामा बैठक बसिरहेको छ ।