शुक्रबार, २२ चैत २०८१

बिर्खेले पैसा खायो, सञ्चितालाई गाली


काठमाडौँ । नेपाली लोकगीतको क्षेत्रमा अहिले नयाँ रडाको सुरु भएको छ ‘बिर्खे काण्ड’ । लोक गायक बिर्ख विश्वकर्माले आफूलाई ब्लड क्यान्सर भएको भन्दै स्वदेशदेखि विदेशसम्म रहेकाहरुसंग आर्थिक सहयोग मागेर बेपत्ता भएपछि अहिले सामाजिक सञ्जालमा बिर्ख विश्वकर्मासंगै उनका लागि सहयोगको अपिल गरिदिने मोडल सञ्चिता शाहीलाई गालीको वर्षा सुरु भएको छ ।

बिर्ख विश्वकर्माले अनुहारभरि आलो रगत लत्पलिएको तस्विर सामाजिक सञ्जालमार्फत सार्वजनिक गर्दै आफूलाई ब्लड क्यान्सर भएको भन्दै सहयोगका लागि अपिल गरेपछि मोडल सञ्चिताले पनि सहयोगका लागि आग्रह गरेकी थिइन् । बिर्खको खातामा अहिलेसम्म सहयोगीहरुबाट एक करोड रुपैयाँभन्दा बढी जम्मा भएको अनुमान गरिएको छ ।

बिर्ख सम्पर्कविहीन भएलगत्तै बिर्खलाई सहयोग गर्नेहरु आक्रोशित मात्रै छैनन् । सञ्चिालाई गाली गर्दै प्रश्न गरिरहेका छन् ‘अस्पतालको रिपोर्टसमेत नहेरी किन सहयोग मागिस् ?’ भन्ने भावमा । जवाफमा सञ्चिताले सामाजिक सञ्जालबाटै माफी माग्दै आफू पनि झुक्किएको भन्दै सहयोगको अपिल गर्नु आफ्नो महाभूल भएको बताइरहेकी छिन् । सहयोग रकम बाँडीचुँडीमा सञ्चिताको पनि संलग्नता रहेको भन्नेहरु धेरै छन् ।

युट्युबरका लागि आम्दानीको स्रोत

‘बिर्खेले ठग्यो’ भनेर सामाजिक सञ्जालमा रुवाबासी गर्नेहरुले अहिलेसम्म प्रहरीमा कतै पनि उजुरी गरेको छैनन् । साँच्चै ठगेरै हिँडेको हो या गम्भीर बिरामी पो हो कि? यतातर्फ कसैले ध्यान दिएका छैनन् । बिर्ख विश्वकर्मासंगै सञ्चिता पनि ठगी धन्दामा हो कि होइन भन्ने आधिकारिक अनुसन्धान गर्नेतर्फ कसैले चासो दिएका छैनन् ।

तर, यही विषय केही युट्युब च्यानलका लागि पनि राम्रो कमाई खाने स्रोत बनेका छ अहिले । बिर्ख विश्वकर्मा र सञ्चिताका पुराना भिडियो क्लिप जोडेर ‘यसरी ठग्यो’ शीर्षकमा भिडियो बनाउनेहरुका लागि अहिले ‘बिर्खे काण्ड’ कमाईको गतिलो स्रोत भएको छ ।

लोक गायनमा यस्तो भइरहन्छ

लोक गायनको क्षेत्रमा सक्रिय कलाकार, मोडल, भिडियो निर्देशकको छुट्टै दुनियाँ छ । ‘मेनस्टिम मिडिया’ को पहुँचभन्दा टाढै रहन रुचाउने छन् प्राय । उनीहरुलाई थरीथरी नामका युट्युब नै प्यारो लाग्छ ।

लोक क्षेत्र (गायन, अभिनय, वाद्यवादन)बाट कमाई राम्रै हुने भए पनि सामान्य घटना हुँदा पनि स्वदेशदेखि विदेशमा बस्नेहरुसंंग केही माग्नु सामान्य लाग्छ याे क्षेत्रमा लाग्नेहरुका लागि । 

टिप्पणीहरू:



यो पनि तपाईंलाई मन पर्न सक्छ