झारखण्डमा हात्तीको बथान गाउँ छिर्यो

नयाँ दिल्ली । झारखण्डको हजारीबाग जिल्लाको चर्चु ब्लकको गोन्डवार गाउँमा हात्तीको बथान प्रवेश गर्दा छ जनाको मृत्यु भएको छ । आङ्गो प्रहरी चौकी क्षेत्रको रामगढ–हजारीबाग सीमा नजिकै बिहीबार बिहान घटना भएको हो । राती १२ देखि १ बजेको बीचमा पाँचवटा हात्तीको बथान गाउँमा प्रवेश गरेपछि आतंक मच्चिएको थियो ।

इन्डियन एक्सप्रेसका अनुसार, पूर्वी वन डिभिजनका डिभिजनल वन अधिकृत (डीएफओ) विकास कुमार उज्ज्वलले भने ‘यो त्यही बथान हुन सक्छ जुन हालैका समयमा बोकारो जिल्लामा भएका घटनाहरूमा संलग्न थियो ।’

प्रारम्भिक जानकारी अनुसार, हात्तीहरू एक जिल्लाबाट अर्को जिल्लामा द्रुत गतिमा सरिरहेका थिए र तिनीहरूको व्यवहार असामान्य र आक्रामक देखिन्थ्यो । प्रत्यक्षदर्शीहरू र वन विभागका अनुसार हात्तीहरू गाउँमा पसे र घरमा राखिएको धानमा आक्रमण गरे । आवाज सुनेपछि गाउँलेहरू बाहिर निस्कँदा उनीहरूको सामना सिधै बथानसँग भयो ।

घटनामा परी मृत्यु हुनेमा सुमन कुमारी (२६), धनेश्वर राम (५२), सुरज राम (५०), सविता देवी (२५), अनुराग राम (१) र सञ्जना कुमारी (३) छन् ।
यो पछिल्लो घटनासँगै, विगत दश दिनमा बोकारो र हजारीबाग जिल्लाहरूमा यस झुण्डसँग सम्बन्धित मृत्युको संख्या ११ पुगेको छ । फेब्रुअरी ५ मा, बोकारोको बडकिपुनु गाउँमा एकै परिवारका तीन वृद्धवृद्धालाई कुल्चिएको थियो ।

दुई दिन पछि, फेब्रुअरी ७ मा, गंगपुर गाउँमा अर्को परिवारका दुई सदस्यको मृत्यु भयो ।

वन विभागका टोलीहरू उक्त क्षेत्रमा खटिएका छन् र माइक्रोफोन मार्फत सार्वजनिक घोषणाहरू गरिँदै छन्, रातमा घरबाट बाहिर ननिस्कन मानिसहरूलाई आग्रह गरिएको छ । बथानलाई जंगलमा धपाउने प्रयास भइरहेको छ ।

बांकुराबाट आएको विशेष टोली रामगढमा तैनाथ छ र हात्तीको चालचलनको निगरानी गरिरहेको छ । आवश्यक परेमा वान्तारा टोलीलाई पनि बोलाउन सकिन्छ ।
हात्तीहरूको आक्रामक व्यवहारको कारण पत्ता लगाउन अहिले नै हतार हुने डीएफओले बताए । सम्भवतः तिनीहरू ‘मस्ट’ को अवस्थामा छन्, जुन एक देखि दुई महिनासम्म रहन सक्छ, जुन अवधिमा तिनीहरूको व्यवहार अझ आक्रामक हुन्छ ।

यसको पुष्टि गर्न एक अनुगमन टोली गठन भइरहेको छ र छुट्टै अनुसन्धान पनि गरिनेछ ।

जिल्ला प्रशासनलाई प्रभावित क्षेत्रहरूमा मानव जीवनको रक्षा गर्न सावधानी अपनाउन भनिएको छ ।

मृतकका परिवारलाई अन्त्येष्टिको लागि प्रारम्भिक सहयोग प्रदान गरिएको छ र नियमानुसार क्षतिपूर्ति वितरणको प्रक्रिया सुरु गरिएको छ । वन विभागले सर्वसाधारणलाई हात्तीको नजिक नजान अपील गरेको छ । बथान वरपर हुँदा तिनीहरूलाई धपाउने प्रयास नगर्न अनुरोध गरेको छ ।