जब कुमारीका निर्देशकले हरिबंश आचार्यलाई ‘रिजेक्ट’ गरे

काठमाडौँ । कलाकार हरिवंश आचार्य ६७ वर्षका भए । उनको कामप्रतिको लगाव १६ वर्षे तन्नेरीको भन्दा कम छैन । हरेक पटक काम गर्दा उत्तिकै मेहनत गर्ने उनको भनाई छ ।

‘चलचित्रमा अभिनय गर्दा होस् वा प्रहसन गर्दा अहिले पनि मेरो मुटू ढुकढुक हुन्छ, मनमा डर उत्पन्न हुन्छ । त्यो डर भनेको मेरा लागि अनुशासन हो ।’ उनले भने ‘ त्यसले मलाई मेहनत गर्न प्रेरित गर्छ, त्यही कारण मेरो कलाकारिताको यात्रा यहाँसम्म आइपुगेको हो, जस्तो लाग्छ ।’

कुनै पनि मानिसलाई अनुशासनले सफलता दीर्घायु बनाउने उनको बुझाई छ । नकारात्मक सोचबाट मुक्त भई स्वस्फूर्त रूपमा लगनशील भई काममा समर्पित हुन सुझाव दिँदै आचार्य भन्छन् ‘समर्पणभावले आफू सम्बद्ध पेशा, व्यवसायमा होमिएपछि सफल नजिकै आउछ । ‘मह’जोडीका रूपमा स्थापित वरिष्ठ कलाकार ‘द्वय’लाई समर्पण र निष्ठाको उपजका रूपमा लिने गरेको पाइन्छ । ‘मह’ जोडीका ‘म’ अर्थात् मदनकृष्ण श्रेष्ठ कलाकारितासँगै सामाजिक रूपमा समेत उच्च स्थान बनाउन सफल भएका छन् ।  

रङ्गमञ्चमार्फत आफ्नो कलाकारिता सुरू गरेका आचार्य लामो समयदेखि नाटकमा देखिएका छैनन् । यद्यपि मञ्चमा गरिने प्रहसन र नाटकउस्तै भएको अभिनेता आचार्य  बताउछन् ।

‘नाटक र प्रहसनउस्तै हो, खासै अन्तर छैन । किनकि दुवैमा दर्शकको अगाडि मञ्चमा कलाकारले आफूलाई प्रस्तुत गर्छन्, मैले यसै वर्ष पनि केही प्रहसन गरेँ । त्यसकारण म आफूलाई नाटकबाट टाढा रहेको जस्तो लाग्दैन ’ उनले भने । 

हरिप्रसाद रिमालले सिकाएको संवाद

कला क्षेत्रका लागि रङ्गमञ्च आमाको काँख झैँ भएकाले यहाँ सिकिने कलाकारिता दीगो हुने अनुभव सुनाए । राष्ट्रिय नाँचघरमा ‘गुरू हरिप्रसाद रिमाल’सँग नाटक तथा कलाकारले बोल्ने संवादको शैली सिकेको स्मरण गर्दै वरिष्ठ अभिनेता आचार्यले अभिनयमा रुचि राख्नेले आफूलाई रङ्गमञ्चमा प्रस्तुत गर्नुपर्ने धारणा व्यक्त गरे ।

“मैले आदरणीय गुरू रिमालसँग आँखाले अभिनय गर्छ भन्ने सिकें, त्यहाँ मैले मदन दाईसँग गरेको नाटक विज्ञापनलाई नेपालसँगै विदेशमा समेत प्रस्तुत गरेँ । हामीले त्यो नेपालमा मात्र ४०० को हाराहारीमा मञ्चन गरेका थियौँ । हाम्रो अभिनयको सुरुआत नै रङ्गमञ्चबाट भएको हो”, उनले ।

कुमारीबाट रिजेक्ट

आचार्यले अभिनय गरेको पहिलो चलचित्र ‘कुमारी’ हो । उक्त चलचित्रमा कलाकार चाहिएको सूचना गोरखापत्र दैनिकमा देखेपछि आचार्यले आफू अभिनय गर्न इच्छुक रहेको भनी निवेदन दिएका थिए । उक्त चलचित्रका निर्देशकको अगाडि एउटा चलचित्रको दृश्यलाई राम्रोसँग प्रस्तुत गरेपनि आफू उक्त भूमिकाका लागि छनोट नभएको अभिनेता आचार्यले बताए ।

“मैले राम्रो ‘अडिसन’ दिए पनि मेरो उमेरका कारण ट्रक चालकसँग सहचालकको भूमिका गर्न पाइन् । उक्त भूमिका गर्दा बालश्रमका समस्या देखिने भएपछि मैले एउटा सानो भूमिका गरेँ । त्यसपछि ‘सिन्दुर’मा एक ज्योतिषको भूमिका निर्वाह गरेँ”, उनले भने ।

स–साना भूमिकामा देखिएता पनि उनले ‘जीवनरेखा’ र ‘बासुदेव’ पछि राम्रो र बढी समय पर्दामा देखिने अवसर प्राप्त गरे । त्यसपछि अभिनयमा सक्रिय रहेका अभिनेता आचार्य अहिले पनि उस्तै रूपमा निरन्तर क्रियाशील छन् । आफैँ लेखक र निर्देशकसमेत रहेका आचार्य अरूका चलचित्रमा पनि कलाकारका काम गर्न रुचाउछन् ।

“अन्य कलाकर्मीका चलचित्र तथा प्रहसनमा कलाकार भएर काम गर्न पाउँदा मलाई सहज महसुस हुन्छ, आफैँले लेखन वा निर्देशन गरेको पात्रलाई निर्वाह गर्दा अलि बढी मेहनत गर्नुपर्छ”, उनले भने ।

उनले अभिनय गरेको चलचित्र ‘भूठान’ आउँदो वर्ष विसं २०८२ मा प्रदर्शन हुनेछ ।