- असार ०६, २०८०
समयआवाज संवाददाता
काठमाडौं । सार्वजनिक लेखा समितिका संयोजक ऋषिकेश पोखरेलले उर्जा उत्पादन क्षेत्रको विकासका लागि समिति कँही कतै बाधक नहुने बताएका छन् ।
आर्थिक पत्रकार संघ (नाफिज)ले मंगलबार काठमाडौंमा आयोजना गरको ‘जलविद्युत लगानी शेयर व्यवस्थापन र चुनौती’ विषयका कार्यक्रममा बोल्दै समितिका संयोजक पोखरेलले सरकारले अघि सारेको सुखी नेपाली समृद्ध नेपालको नारा पूरा गर्न उर्जाको क्षेत्रमा लागेकालाई साथ दिन तयार रहेको बताए ‘म प्रतिवद्धता व्यक्त गर्दछु । सकारात्मक कामका लागि लेखासमिति कहिल्यै वाधक बन्दैन ।’
लेखासमितिले आफ्नो अधिकार क्षेत्र भन्दा बाहिर गएर नेपाल धितोपत्र बोर्ड (सेबोन)लाई दिएको निर्देशनको सन्दर्भमा संयोजक पोखरेलले आफुहरुले अध्ययन गरेरै निर्देशन दिएकाे दावी गरे । धितोपत्र बोर्डको विषयमा पनि निवेदन परेकाले लेखासमिति निर्देशन दिन वाध्य भएको उनको भनाई थियो ।
बाेर्डले समितिकाे निर्देशनकाे हवाला दिँदै कतिपय सवालमा पन्छिदै आएकाे प्रसंगमा पाेखरेलले नियामक निकाय जवाफदेही हुन नपाउने भनाई राखे । ‘सरकारले कानुनको किताव हातमा दिएर तलब दिएर राखेका मान्छेले गैरजिम्मेवारी जवाफ दिन पाइदैन ।’ उनले भने ‘कुनै विषयमा समस्या भएपछि छलफलका लागि आउनुपर्छ तर, हामीसंग अहिलेसम्म कोही पनि छलफलका लागि आएको छैन ।’
वाद प्रतिवाद भन्दा पनि समस्पा समाधान गर्नमा लाग्न आग्रह गर्दै संयोजक पोखरेलले कतिपय कम्पनीले शेयर दिने नाममा स्थानियलाई ऋणको भारी बोकाएर हिँडेकाले पनि आइपिओ निस्कासनका विषयमा सेबोनलाई निर्देशन दिन वाध्य भएको बताए । ‘कतिपय कुहिएका कम्पनी, अब कहिल्यै उठ्दैन भनेका कम्पनीको पुर्नमुल्याङ्कन गरेर आइपिओ जारी गर्न दिएको दर्जनौ उदहारण छ । तिनलाई कार्वाही हुँदैछ ।’ उनले सेबोनलाई निर्देशन दिनुको कारणबारे भने ।
कतिपय कम्पनीले स्थानियलाई शेयर दिने बहानामा ऋणको भारी बोकाएर हिँडेको भन्दै उनले प्रश्न गरे ‘स्थानियलाई १० प्रतिशत शेयर दिनु भनेको तपाईले कमाएको नाफाको प्रतिश बाँड्नु भनेको कि ऋणको भारी बोकाउनुस् भनेको ?’
कसैले इमालको कुरा ग-यो भने बेइमानहरुको झुण्ड एकिकृत भएर आएको प्रसंग निकाल्दै संयोजक पोखरेलले उर्जा उत्पादहरुलाई जति सक्दो चाँडो छलफलमा सहभागी हुन आग्रह गर्दै भने ‘समस्याको समाधान छलफलबाटै निकालौं ।’
टिप्पणीहरू: