एमालेकाे विशेष प्रस्ताव : राजा फर्किने सम्भावना छैन

काठमाडाै‌ं ।  नेकपा एमालेले राजा फर्किने कुनै आधार र सम्भावना नभएकाे निष्कर्ष निकाल्दै विशेष प्रस्ताव पारित गरेको छ ।

आइतबार पार्टी कार्यालय च्यासलमा बसेको सचिवालय बैठकले विशेष प्रस्ताव पारित गरेको उपमहासचिव प्रदीप ज्ञवालीले जानकारी दिए ।

विगतमा भएका सहमति विपरित राजतन्त्रले जनताका अधिकारमाथि आक्रमण गर्न खाेजेपछि राजतन्त्र र लोकतन्त्र सँगै जान सक्दैनन् भन्ने निष्कर्ष एमालेले निकालेकाे छ । साथै  जनताको फैसला उल्ट्याउने र मुलुकलाई पश्चगामी दिशामा फर्काउने कुनै पनि प्रयास सफल हुन नसक्ने एमालेले पारित गरेको विशेष प्रस्तावमा उल्लेख गरिएकाे छ ।

केही समययता गणतन्त्र र संविधानप्रति भइरहेका सुनियोजित घटनाक्रमप्रति पार्टीको गम्भीर ध्यानाकर्षण रहेको ज्ञवालीकाे भनाई छ ।

‘केही समययता लोकतान्त्रिक गणतन्त्र र नेपालको संविधानप्रति भइरहेका सुनियोजित घटनाक्रमप्रति नेकपा एमालेको गम्भीर ध्यानाकर्षण भएको छ,’ ज्ञवालीले भने ।