हरेक दिन दुई हजार २२७ युवाले देश छाड्छन्

काठमाडौँ । प्रमुख राजनीतिक दलहरु सत्ता छिनाझम्टीमै रुमल्लिइरहेको बेला देश छाड्ने युवाहरुको संख्या भने बढ्दो छ । वैदेशिक रोजगार विभागको तथ्य अनुसार हरेक दिन दुई हजार ७ सय २७ युवाले देश छाड्छन् ।

विभागकै तथ्याङ्क अनुसार पछिल्लो ८ महिनामा साँढे ५ लाख बढी युवाले देश छाडेका छन् ।

चालु आर्थिक वर्ष २०८१÷८२ को ८ महिना (साउन–फागुन) मा साँढे ५ लाख बढी युवाले देश छाडेका छन् । विभागका अनुसार फागुनमा ६८ हजार ९ सय ६३ युवाले श्रम स्वीकृति लिएका छन् । यो सँगै यस वर्ष कुल पाँच लाख ३४ हजार ४७१ युवाले देश छाडेका छन् । यो संख्या गत आव २०८०÷८१ को यसै अवधिको तुलनामा ६३ हजार बढी हो ।

अघिल्लो वर्ष ८ महिनामा चार लाख ७१ हजार युवाले श्रम स्वीकृति लिएका थिए ।  यो नयाँ तथा पुनः श्रम स्वीकृति लिने युवाको संख्या हो । नेपालबाट अहिले मासिक औसत ६६ हजार ८०८ युवा काम खोज्दै विदेशिने गरेका छन् । यस वर्ष नेपालीको प्रमुख गन्तव्य खाडी मुलुक युनाइटेड अरब इमिरेट्स (यूएई) रहेको छ ।

विभागका अनुसार फागुनमा मात्र यूएईका लागि २५ हजार ११७ जनाले श्रम स्वीकृति लिएका छन् । योसँगै ८ महिनामा यूएईका लागि कुल एक लाख ७३ हजार २५० जनाले श्रम स्वीकृति लिएका छन् । यस वर्ष विदेशिएका कुल युवामध्ये यूएई गएको संख्या ३२.४१ प्रतिशत छ । 

यूएईपछि साउदी अरब, कतार, कुवेत, मलेसिया प्रमुख गन्तव्य रहेको देखिन्छ । यद्यपि, यस वर्ष मलेसियाको रोजगारीमा जाने संख्या भने घटेको छ । गत वर्ष प्रमुख गन्तव्य मलेसिया रहेकोमा यस वर्ष पाँचौँ स्थानमा झरेको छ । यस वर्ष फागुनमा जम्मा तीन हजार ७१५ युवाले मात्र मलेसियाका लागि श्रम स्वीकृति लिएको देखिन्छ । जापानमा १ हजार ९ सय ६६ र कोरियामा १ हजार ८ सय ८३ जनाले श्रम स्वीकृति लिएका छन् । क्रोएसिया, रोमानिया, ओमान, बहराइन समेत धेरै नेपाली श्रम गर्न जाने देशमा पर्छन् । 

फागुनमा मात्र २० हजार ८२४ अदक्ष कामदार विदेशिएका छन् । माघमा यो संख्या २२ हजार ३७४ थियो । त्यस्तै पुसमा २० हजार ५ सय ६६ अदक्ष कामदारले श्रम स्वीकृति लिएका थिए । मंसिरमा अदक्ष कामदार संख्या २१ हजार ७१६ थियो । कात्तिकमा यो संख्या १५ हजार ९७१ थियो । 

यस वर्ष साउनमा ५९ हजार ५७५ जना विदेशिएको तथ्यांक छ । भदौमा ५७ हजार ४९३, असोज ५३ हजार ५२५, कात्तिक ७० हजार ९९०, मंसिर ८४ हजार २२६ र पुसमा ६७ हजार २५८ जना विदेशिएका थिए । त्यस्तै माघमा ७२ हजार ४४१ जनाले श्रम स्वीकृति लिएका छन् ।