पूर्वराजालाई स्वागत गर्ने तयारीमा राजावादी, विमानस्थल प्रवेशमा कडाइ

काठमाडाैँ। पूर्वराजा ज्ञानेन्द्र शाह पोखराबाट आज काठमाडौँ फर्किने भएपछि राजावादीहरुले जुलुससहित स्वागत गर्ने तयारी गरेका छन् ।

आज दिउँसो करिब साढे ३ बजे काठमाडौँ फर्किन लागेका पूर्वराजाको स्वागतमा राजावादी दल र समूहहरुले काठमाडौंका विभिन्न स्थानबाट र्‍यालीसहित प्रदर्शनको तयारी गरेका हुन् ।

पोखराकाे एक साता बसाइपछि पूर्वराजा शाह आज दिउँसो हवाईमार्ग हुँदै काठमाडौंकाे त्रिभुवन अन्तर्राष्ट्रिय विमानस्थलमा ओर्लिने छन् ।

उनकाे स्वागतमा राजावादीहरुले विमानस्थल गेटदेखि महाराजगञ्जस्थित निर्मल निवाससम्म र्‍यालीसहित प्रदर्शन गर्न लागेका हुन् ।

उनीहरुको प्रदर्शनलाई मध्यनजर गर्दै काठमाडौंकाे सुरक्षा व्यवस्था कडा बनाएको छ।

यसैगरी विमानस्थलकाे सुरक्षा व्यवस्थामा कडाइ गरिएको छ। विमानस्थलकाे गोल्डेन गेटबाट प्रवेश कडा गरिएकाे छ। हवाई टिकट भएका यात्रु र स्टाफबाहेक अरूलाई विमानस्थलभित्र छिर्न राेक लगाइएको छ।