रिंकु सदा बलात्कार आरोपी पक्राउ नगरेको भन्दै लाहानमा प्रदर्शन

सिरहा । रिंकुकुमारी सदाको रहस्यमय मृत्यु भएकोमा प्रहरीले अहिलेसम्म आरोपितलाई पक्राउ नगरेको भन्दै मुसहर समुदायले शुक्रबार लाहानमा प्रदर्शन गरेका छन् ।

घटना घटेको २० दिन भइसक्दा पनि मुख्य आरोपितलाई पक्राउ नगरेको भन्दै प्रदर्शन गरेका हुन् । प्रदर्शनकारीले शुक्रबार एक घन्टा पूर्व–पश्चिम राजमार्ग अवरुद्ध गरेका थिए ।

गत २७ माघमा शौच गर्न गएकी रिंकुलाई अपहरण गरी तीन युवाले बलात्कार गरी अचेत अवस्थामा घर पु¥याएका थिए ।

आफु माथी तीन जनाले बतात्कार गरेको जानकारी दिए लगत्तै घटना मिलाउन भन्दै गाउँमै पञ्चायत भएको थियो । पञ्चायत भएको भोलीपल्ट रिंकु घरमै झुण्डिएको अवस्थामा फेला परेकी थिइन् ।

पीडित परिवारले बलात्कारका तीन आरोपी र पञ्चायतमार्फत दबाब दिने पाँचसहित आठ जनाबिरुद्ध जाहेरी दिए पनि बतात्कार आरोपी अहिलेसम्म पक्राउ परेका छैनन् ।