- असार ०६, २०८०
समयआवाज संवाददाता
काठमाडौं । नेकपा एमाले मोरङको अधिवेशन सम्पन्न भएको एक साता पूरा भयो । तर, मोरङ अधिवेशनको ‘ह्याङ’ एमाले संस्थापन पक्षमा अझै बाँकी छ । कारण, उक्त अधिवेशनमा अध्यक्षसहित पदाधिकारीमा पार्टी अध्यक्ष केपी शर्मा ओलीले नरुचाएका मान्छेहरुले जिते । अध्यक्ष ओलीको सन्देश बोकेर गएका उपाध्यक्ष रामबहादुर थापा ‘बादल’ र महासचिव शंकर पोखरेलले पटक पटक चुनाव नगरी सर्वसम्मत नेतृत्व चयनका लागि दबाब नदिएका होइनन् तर, उनीहरुले पार लगाउन सकेनन् । तीन दिनमा सकिने चुनाव केन्द्रीय नेतृत्वको दबाबकै कारण एक हप्ता लम्बियो । एमालेका एक नेता भन्छन्, ‘मोरङमा केन्द्रीय नेतृत्वले नचाहँदा नचाहँदै चुनाव भयो । नेतृत्वले नचाहँदा नचाहँदै अध्यक्षमा अजम्बर राईसहित पदाधिकारीमा संस्थापन इतर प्यानलै विजयी भयो ।
मोरङ अधिवेशनलाई अहिले एमाले कार्यकर्ताहरुले ११औँ महाधिवेशनको ‘रिहर्सल’ भनेर व्याख्या गर्न थालेका छन् । कुनैबेला ‘म कक्षा दोहोर्याउँदिनँ’ भनेका ओलीले जुँगा कालो हुँदै गएको कुरा गरेपछि ११औँ महाधिवेशनमा पनि आफैँ नेतृत्वमा आउने उनको चाहना कार्यकर्ताले बुझे ।
ओलीलाई फेरि पनि नेतृत्व दियो भने पार्टी थप कमजोर हुन्छ र त्यसले एमालेलाई क्षति गराउँछ भन्नेमा धेरै कार्यकर्ता सहमत छन् ।
त्यसमाथि विधानमा भएको उमेर हद पनि ओलीले हटाएपछि बिच्किएका एमाले कार्यकर्ताहरुले ओलीको विकल्पमा पूर्वराष्ट्रपति विद्या भण्डारीलाई अघि सारिरहेका छन् । त्यसो त भण्डारीले पनि आफू सक्रिय राजनीतिमा आउने संकेत गरिसकेकी छन् ।
एमालेका एक नेताका अनुसार आफूलाई ओली पक्षीय भनेर दाबी गर्नेहरु पनि भण्डारीलाई अघि सार्ने योजनामा भित्री रुपमा लागेका छन्। ‘ओलीलाई फेरि पनि नेतृत्व दियो भने पार्टी थप कमजोर हुन्छ र त्यसले एमालेलाई क्षति गराउँछ भन्नेमा धेरै सहमत छन्’, ती नेताले भने ।
सचिवालयमै अहिले ओली अल्पमतमा छन् । सचिवालयमा भएका नौ जनामध्ये अष्टलक्ष्मी शाक्य, विष्णु रिमाल, शंकर पोखरेल र प्रदीप ज्ञवाली मात्रै ओलीको पक्षमा छन् ।
दुई कार्यकाल राष्ट्रपति भएकी भण्डारी शीतल निवास छाडेलगत्तै राजनीतिक रुपमा सक्रिय हुन थालेकी छन् । प्रारम्भमा केही सामाजिक कार्यक्रममा सहभागी भएकी उनी अहिले एमालेका जनवर्गीय संगठनहरूले गरेका कार्यक्रममा ‘पार्टी नेताकै हैसियत’मा सहभागी हुन थालेकी छन् ।
फेरि नेकपा
नेपाली कांग्रेस, एमाले, नेकपा माओवादी केन्द्रलगायत पुराना पार्टीले मिसन ०८४ भन्दै विभिन्न अभियान सुरु गरे पनि ०८४ सालको निर्वाचन पुराना पार्टीका नेताहरुले भनेजस्तै सहज छैन । राष्ट्रिय स्वतन्त्र पार्टी र स्वतन्त्र उम्मेदवारहरुले उत्तिकै टक्कर दिने सम्भावना छ ।
यी घटनाक्रमबारे जानकार भण्डारी फेरि एकपटक नेकपा बनाउन चाहन्छिन् । विभिन्न कारणले विभाजित कम्युनिष्टहरुलाई एकताबद्ध गरेर बृहत बाम गठबन्धन गरेर फेरि एकपटक एमालेलाई उचाईमा पुर्याउने उनको चाहना छ । बृहत बाम एकता अभियानलाई माओवादी अध्यक्ष पुष्पकमल दाहाल प्रचण्ड र नेकपा एकीकृत समाजवादी पार्टीका अध्यक्ष माधवकुमार नेपालले पनि सकारात्मक रुपमा लिएकाले भण्डारीको आत्मबल बढेको छ । बेलाबखत कम्युनिष्ट नेताहरुले बाम एकताको कुरा गरे पनि साझा नेता नपाउँदा एकता प्रक्रियाले गति लिन सकेको छैन । परिस्थितिले भण्डारीलाई अहिले साथ दिएको छ । प्रचण्ड, माधव नेपालदेखि विप्लवसमेत नेता मान्न तयार हुने परिस्थिति निर्माण भइरहेको छ ।
अर्ली महाधिवेशनको योजनामा ओली
भण्डारीले नेतृत्वका लागि पहलकदमी सुरु गरेपछि अध्यक्ष केपी ओली ‘अर्ली महाधिवेशनको मुड’ मा छन् । आफू सत्तामा हुँदै महाधिवेशन गर्न सकेमा पुन: नेतृत्वमा आउन सकिने भन्दै पार्टीमा महाधिवेशन केन्द्रित छलफल अगाडि बढाएका छन् । २०७८ मंसिर १० देखि १४ गतेसम्म चितवनमा भएको एमालेको दशाैँ राष्ट्रिय महाधिवेशनबाट दोस्रो कार्यकालका लागि अध्यक्ष चुनिएका थिए, ओली ।
विधानअनुसार आगामी २०८३ साल मंसिरसम्म ११औँ महाधिवेशन गरिसक्नुपर्छ । तर, ओली आफू प्रधानमन्त्री पदमा भएकै बेला महाधिवेशन गर्ने मुडमा छन् । सत्ता साझेदार दल कांग्रेससँगको सम्झौता अनुरुप उनी २०८३ साल असारसम्म प्रधानमन्त्री रहनेछन् । त्यसपछि कांग्रेस सभापति शेरबहादुर देउवालाई प्रधानमन्त्री पद हस्तान्तरण गर्नुपर्नेछ ।
टिप्पणीहरू: