पशुपतिको बालुवाखानीमा भ्रष्टाचार: काठमाडौँका पूर्वसीडीओसहित ३ जना पक्राउ

काठमाडौं। पशुपतिको बालुवाखानीमा भएको भ्रष्टाचारमा दोषी ठहर भएका तीन जना पक्राउ परेका छन् ।

नेपाल प्रहरीको केन्द्रीय अनुसन्धान ब्यूरो (सीआईबी)को टोलीले तीन जनालाई पक्राउ गरेको हो ।

पक्राउ पर्नेमा काठमाडौँका पूर्वप्रमुख जिल्ला अधिकारी (सीडीओ) प्रेमराज जोशी, पशुपति विकास कोषका पूर्वनिर्देशक राजुकुमार रेग्मी र पूर्वस्थानीय विकास अधिकारी (एलडीओ) महेन्द्रलाल श्रेष्ठ रहेका छन् ।

माघ ३० गते सर्वोच्च अदालतले पशुपतिको जग्गामा बालुवाखाली सञ्चालन गर्न दिँदा भ्रष्टाचार गरेको आरोपमा एमाले नेता निर्मल कुइँकेलसहित ९ जनालाई दोषी ठहर गरेको थियाे ।

काठमाडौंकाे साविकको गोठाटार गाविस-३ को कित्ता नम्बर ५९ र ८४ तथा वडा ४ को कित्ता नम्बर ८० को ५३४ रोपनी जग्गाहरूमा अवैध रूपमा रूख कटान एवं बालुवा तथा माटो उत्खनन् गरी पशुपति क्षेत्र विकास कोषलाई हानी नोक्सानी पुर्‍याइ जिविस शुल्क तथा रोयल्टीसमेत छली गरेको भनेर अख्तियार दुरूपयोग अनुसन्धान आयोगले २०७१ मा विशेष अदालतमा मुद्दा दायर गरेको थियो ।