प्रश्न गर्ने संस्कारलाई संस्थागत गर्न हाम्रो यात्रा

प्रश्नहरुबाट सत्ता सञ्चालक र प्रतिपक्ष पार्टीहरुसमेत तर्सिन थालेको अवस्थामा हामी ओम देव सञ्चार प्रालिद्वारा सञ्चालित ‘समयआवाज डटकम’ मार्फत प्रश्नहरुलाई संस्थागत गर्ने अभियानका साथ मिडियाको भिडमा उपस्थित भएका छौँ ।

युवा पुस्तामा देखिएको चरम निराशा, सामान्य भन्दा सामान्य गतिविधिका लागि पनि सरकारलाई घच्घच्याइरहनुपर्ने अवस्था त छँदैछ, उद्यमी व्यवसायीका पनि उर्जा हराएकाे अवस्था छ । यस्ताे परिस्थितिमा मिडिया उद्योग सञ्चालन गर्न उति सहज छैन । यो आफैँमा चुनौतीपूर्ण कर्म हो भन्ने जान्दाजान्दै पनि हामी आएका छौँ । यही चुनौतीका बिच अवसरको सिर्जना गर्ने अभियानमा हामी छौँ ।

हाम्रा लागि सबैभन्दा ठुलाे सम्पत्ति भनेकै हाम्रा पाठक, दर्शक, स्रोता हुन् । पत्रकार आचार संहिताभित्र रहेर पाठकका लागि तथ्यमूलक सामग्री प्रस्तुत गर्ने मूलमन्त्रमा हामी प्रतिबद्ध छौँ । संस्थाको उमेरका हिसाबले हामी शिशु भए पनि हामीसँगै जोडिएका परिपक्व टिमले हाम्रा पाठकका अपेक्षा अनुरुप सामग्री प्रस्तुत गरेर समाचारमा विश्वसनीयता आर्जन गर्नेमा हामी ढुक्क छौँ ।

प्रविधिको विकाससँगै फष्टाउँदै गएको ‘सिटिजन जर्नालिजम’ले कतिपय अवस्थामा हाम्रा पाठकलाई दिग्भ्रमित पारेको पनि हामीले अनुभव गरेका छौँ । सामाजिक सञ्जालको बढ्दो प्रभावले मिडिया झण्डै-झण्डै छायामा पर्ने अवस्था नआएको होइन । सामाजिक सञ्जालमा प्रेषित कतिपय सामग्रीकै कारण कतिपयलाई अन्यौलग्रस्त बनाएको अवस्था पनि छ ।

यति हुँदाहुँदै पनि आम नागरिकमा प्रश्न गर्ने संस्कार विकास हुँदै जानुलाई हामीले उपलब्धिका रुपमा हेरेका छौँ । यो आफैँमा एउटा सकारात्मक पक्ष हो । नागरिक तहबाट गरिने प्रश्नले नै संघ, प्रदेश र स्थानीय सरकारलाई बलियो बनाउने निश्चित छ । लोकतान्त्रिक गणतन्त्र र संघीयता संस्थागत हुने आधार पनि तिनै प्रश्न हुन् । तसर्थ, हामी तमाम प्रश्न गर्नेहरुको साथमा रहेर सत्ताधारी दल र प्रतिपक्षी पार्टीहरुलाई समेत समाचारमार्फत झक्झक्याइरहने छौँ । हामी चाहन्छौँ, सरकार नागरिकको प्रश्न सुनेर दिक्क मान्ने होइन कि प्रश्न हल गर्न बाध्य होस् ।

आशा छ, हाम्रो यो अभियानमा हाम्रा पाठक, दर्शक र स्रोताको साथ रहनेछ । पाठकका सुझाव हाम्रा लागि अचुक अस्त्र भएकाले हामी सदैव सुझावको अपेक्षा गर्दै सुझाव कार्यान्वयनमा प्रतिबद्ध रहनेछौँ ।