बझाङमा चट्याङ लागेर एक जनाको मृत्यु, पहिरोले सडक अवरुद्ध

चैनपुर (बझाङ) । बझाङमा चट्याङ लागेर एकजनाको मृत्यु भएको छ । बुधबार साँझ जिल्लाको वित्थडचिर गाउँपालिका–३ मा पानीसँगै आएको चट्याङ लागेर ७८ वर्षीय धौले बोहराको ज्यान गएको जिल्ला प्रहरी कार्यालयका सूचना अधिकारी प्रहरी निरीक्षक लोकेन्द्र ठगुन्नाले जानकारी दिए । 

जिल्लामा लगातार पानी र अझै चट्याङकाे जोखिम भएको हुँदा सबैलाई सतर्क रहन पनि उनले आग्रह गरे। 

 जयपृथ्वी राजमार्गमा पहिरो खस्दा सडक अवरुद्ध

यहाँको केदारस्यूँ गाउँपालिका–९ को पौडी ढोड्याखेत बजार नजिकै जयपृथ्वी राजमार्गमा पहिरो खस्दा सडक अवरुद्ध भएको छ । साँझको पानीपछि पहिरो खस्दा सडक अवरुद्ध भएको हो । 

यस्तै, वित्थडचिर गाउँपालिकाको लिममा पनि पहिरो खस्दा जयपृथ्वी राजमार्ग अवरुद्ध भएको जिल्ला प्रशासन कार्यालय बझाङले जनाएको छ । सडक अवरुद्ध भएसँगै सञ्चालनका लागि जेसिबी पठाइएको प्रमुख जिल्ला अधिकारी कैलाशबहादुर ठकुराठीले बताए।