ओलीले दिए देउवालाई जन्मदिनको शुभकामना

काठमाडौं, २७ भदौ । प्रधानमन्त्री केपी शर्मा ओलीले नेपाली कांग्रेसका सभापति शेरबहादुर देउवालाई जन्मदिनको शुभकामना दिएका छन् ।

‘आज पूर्व प्रधानमन्त्री, मेरा मित्र शेरबहादुर देउवाको जन्मदिन परेको छ । प्रमुख तीन दलका नेताहरुसँग समसामयिक राजनीतिक विषयमा कुरा पनि भयो। आजको भेटमा शेरबहादुरजीलाई जन्मदिनको शुभकामना दिने अवसर मिल्यो । सुस्वास्थ्य, दीर्घायु र प्रगतिको कामना शेरबहादुरजी ।’ प्रधानमन्त्री ओलीले सामाजिक सञ्जाल फेशबुकमा लेखेका छन् ।

साथै प्रधानमन्त्री ओलीले दोसल्ला ओढाएर देउवालाई शुभकामना दिएको तस्विर समेत फेशबुकमा पोष्ट गरेका छन् ।

देउवाको जन्म सुदुरपश्चिम डडेलधुरामा बिसं २००३ सालमा भएको थियो । २०२२ सालमा सुदुरपश्चिम विद्यार्थी समाजबाट उनले राजनीति सुरु गरेका थिए । पञ्चायती विरोधी आन्दोलनमा पटक पटक जेल परेका देउवा पहिलो पटक उनी २०५२ साल भदौ २६ गते प्रधानमन्त्री बनेका थिए । उनी पाँच पटक प्रधानमन्त्री हुने व्यक्तिका रुपमा चिनिन्छन् ।