सेयर बजारमा नकारात्मक सर्किट ब्रेक, कारोबार स्थगित

काठमाडौँ। सेयर बजारमा नकारात्मक सर्किट ब्रेक लागेको छ। 

गत भदौ २३ र २४ गतेको जेनजी आन्दोलनपछि खुलेको सेयर बजारमा नकारात्मक सर्किट ब्रेक लागेको हाे। लगातार नकारात्मक सर्किट लागेपछि कारोबार स्थगित भएकाे छ।

कारोबार सुरु भएलगत्तै बजार ओरालो लाग्न थालेको थियो। बजार खुलेको दुई मिनेटमै नेप्से परिसूचक चार प्रतिशतले ओरालो लागेको थियो। बजारमा छोटो समयमा नकारात्मक सर्किट लागेको थियो। नेपाल स्टक एक्सेचञ्ज लिमिटेडले बजार २० मिनेट बन्द गरेर पुनः खोलेपछि ११ः २३ मा पुनः दोस्रो सर्किट लाग्यो।

त्यसबेला बजार पाँच प्रतिशतले ओरालो लागेको थियो। दोस्रो सर्किट लागेपछि पुनः ४० मिनेट कारोबार बन्द गरियो। पुनः नेप्सेले १२ः०४ मा बजार खुला गर्दा नेप्से परिसूचक छ प्रतिशतले ओरालो लाग्यो। तेस्रो सर्किट लागेसँगै आजको कारोबार बन्द भएको हो। 

नेप्सेको अनुसार नेप्से परिसूचक १६० दशमलव ३३ अङ्कले ओरालो लागेर दुई हजार पाँच सय ११ दशमलव ९१ मा सीमित भएको छ। सीमित समयमा कूल ७२ करोड ८७ लाख दुई हजार ८३० बराबरको कारोबार भएको छ।