- असार ०७, २०८०
समयआवाज संवाददाता
काठमाडौं । गणतन्त्र तथा राष्ट्रियताको रक्षा र सङ्घीयताको खारेजीका लागि राष्ट्रिय जनमोर्चाले यही चैत्र २४ गतेदेखि ३० गतेसम्म साप्ताहव्यापी राजधानी केन्द्रित आन्दोलन सञ्चालन गर्ने घोषणा गरेको छ। पार्टीका अध्यक्ष चित्रबहादुर केसीद्वारा आयोजित पत्रकार सम्मेलनमा आन्दोलनको विस्तृत कार्यक्रम घोषणा गरिएको हो।
अध्यक्ष चित्रबहादुर केसीले भने: "गणतन्त्र नेपाली जनताले ठूला सङ्घर्ष र बलिदानपछि स्थापित गरेका हुन्। यसलाई ध्वस्त पार्ने षड्यन्त्रलाई परास्त गर्न हामी निरन्तर संघर्षरत छौं। सङ्घीयता नेपालको राष्ट्रियता र आर्थिक स्थायित्वका लागि ठूलो बोझ बनेको छ, त्यसैले यसको खारेजी जरुरी छ।" उनले थपे गणतन्त्र जाेगाउन पनि संघियता खारेज गर्न जरूरी छ ।
पत्रकार सम्मेलनमा पूर्वराजा ज्ञानेन्द्र शाहको फागुन ७ गतेको सन्देश, फागुन २५ गते आयोजित राजावादी शक्ति प्रदर्शन, र चैत्र १५ गतेको हिंसात्मक घटनालाई प्रतिगमनको गम्भीर सङ्केतका रूपमा उल्लेख गरिएको छ। राष्ट्रिय जनमोर्चाले सम्पूर्ण गणतन्त्रवादी शक्तिहरूबीच सहकार्यको आवश्यकता औंल्याएको छ।
उपाध्यक्ष दुर्गा पौडेलले भनिन्: "हाम्रो आन्दोलन कुनै व्यक्ति विशेष वा पार्टी विशेषको विरुद्ध होइन। यो आन्दोलन गणतन्त्र, राष्ट्रियता, र जनताको आर्थिक हितको लागि हो। सङ्घीयता खारेज गरेर स्थानीय तहलाई थप अधिकार सम्पन्न बनाउनुपर्छ।"
राष्ट्रिय जनमाेर्चाका नेता तथा राष्ट्रिय सभा सदस्य तुल प्रसाद बिश्वकर्मा प्रतिक्रिया दिदै संघियता व्यबहारी रूपमा असफल भईसकेकाे छ र देश र जनताकाे हितका लागि संघियता खारेजीका लागि अनिवार्य भएकाे बताए ।
आन्दोलन अन्तर्गत प्रत्येक दिन राजधानीका विभिन्न स्थानमा जुलुस, सभा, सांस्कृतिक कार्यक्रम र प्रचारात्मक अभियान सञ्चालन गरिनेछ। सभा हुने प्रमुख स्थानहरूमा शान्तिबाटिका (रत्नपार्क), चाबहिल चौक, माइतीघर मण्डला, गोंगबु चौक, न्यूरोड (भूगोल पार्क) र भृकुटीमण्डप रहेका छन्।
प्रत्येक दिन दिउँसो २ बजे हुने कार्यक्रममा प्रमुख वक्ताका रूपमा अध्यक्ष चित्रबहादुर केसी, नेता बोमबहादुर खत्री, महासचिव मनोज भट्ट, ने.क.पा. (मसाल) लुम्बिनी प्रदेश प्रवक्ता तिलक जिसी, सल्लाहकार आनन्द शर्मा तथा उपाध्यक्ष दुर्गा पौडेल लगायतका नेताहरूले सम्बोधन गर्नेछन्।
राष्ट्रिय जनमोर्चाले सम्पूर्ण नागरिकलाई आन्दोलनमा सहभागी भई गणतन्त्र र राष्ट्रियताको रक्षामा योगदान दिन अपिल गरेको छ।
टिप्पणीहरू: