जस्ताे ज्ञानेन्द्र, उस्तै कार्यकर्ता

काठमाडौं । राजा फर्काउने अभियानमा रहेका आफूलाई राजवादी भन्नेहरुलाई शुक्रबार दिउँसो भएको प्रदर्शनकारीको हर्कतले निराश बनाएको छ ।

प्रदर्शनको पहिलो दिन राजवादी प्रदर्शनकारीले जुन हर्कत गरे, यसैबाट पुष्टि हुन्छ कि ज्ञानेन्द्र शाहलाई राजगद्दीमा फर्काउने राजवादीको तुष्टिमा पूर्णविराम लागेको छ ।

व्यक्तिका घरमा ढुंगा मुढा, पार्टी कार्यालय ताेडफाेड भाटभटेनीमा ताेडफाेड र लुटपाट, प्रहरीमाथि प्रहार र प्रहरीको बन्दुकै खोसेर केही प्रदर्शनकारीले फोटो पोज दिए । याे घटना सेलाउन नभ्याउँदै राजसंस्था पुनर्स्थापनाका लागि संयुक्त जनआन्दोलन समितिको निर्देशन समितिका सदस्य एवं राप्रपाका वरिष्ठ नेता रवीन्द्र मिश्रले प्रतिक्रिया दिए- ‘कुनै पनि आन्दोलन शान्तिपूर्ण हुँदैन ।’

त्यति मात्रै होइन, आजको अराजकताको जिम्मा सरकारले लिनुपर्ने धारणा राखेपछि लाग्छ- अब राजवादीहरुसंग राजा ल्याउनका लागि हिंसाबाहेक अर्को बाटो छैन ।

व्यवस्था फेरिए पनि अवस्थामा परिवर्तन नभएकाे भन्दै निराश भएपछि एकथरी सर्वसाधारण अहिले ‘राजा आउ देश बचाउ’ भन्दै हिँडेका छन् । नागरिकमा देखिएको त्यही रोष क्यास गर्दै राजा फर्काउने राजवादीको योजनामा आजैको घटनाले ‘ब्रेक’ लगाइदिएको छ ।

हरक आन्दोलनको आफ्नै सिमा हुन्छ । लोकतन्त्रमा अभिव्यक्ति दिनु, आमसभा, जुलुस, प्रदर्शन गर्नु सामान्य घटना हुन् र सार्वभौम नागरिकलाई यी सब गर्ने अधिकार छ । तर, आन्दोलनको बहानमा जसरी व्यक्तिका निजी सम्पत्तिमा ढुंगामुढा र आगजनी गरेर क्षति पुर्‍याइएकाे छ, यसको मूल्य चुकाउन स्वयं राजावादी दललाई महंगो पर्ने निश्चित छ ।

राजा ल्याउँछु भन्दै हिँडेका रवीन्द्र मिश्र वा दुर्गा प्रसाईंले जेजस्ता अभिव्यक्ति दिएका छन् र उनका अभिव्यक्ति सुनेर पूर्वराजा ज्ञानेन्द्र शाह मख्य परेका छन्,  उनका लागि सबैभन्दा ठूलो भूल त्यही हुनेछ । यिनै परिदृश्यले तीन दिनअघि नेपाली कांग्रेसका नेता शेरबहादुर देउवाले भनेको कुरालाई पुष्टि गर्छ- ‘ज्ञानेन्द्र शाहसँग कत्ति पनि बुद्धि छैन ।’

बेला बेलामा ‘देशको माया लागेको’ आशयको विज्ञप्ति जारी गर्ने पूर्वराजा ज्ञानेन्द्र कति अपरिपक्व छन् भन्नका लागि शुक्रबारकै घटना नै काफी छ । राजतन्त्र पुनर्स्थापनाको मागलाई पार्टीको एजेण्डा बनाएको राप्रपालाई बेवास्ता गर्दै खराब ऋणी दुर्गा प्रसाई‌लाई च्यापेबाटै बुझिन्छ, ज्ञानेन्द्र शाहले मुलुकलाई पछाडि धकेल्न सक्दैनन् । उनी आफैँ एक कदम पछाडि धकेलिने निश्चित छ ।

पछिल्लो समय बंगलादेश वा श्रीलंकाको घटनालाई निकै जोडतोडले उठाउने गरिएको छ । श्रीलंकामा सर्वसाधारण नागरिकले पुराना राजनीतिज्ञका घरमा आगजनी गर्नुका साथै भौतिक पूर्वाधारमा क्षति पुर्याएका थिए भने बंगलादेशकी तत्कालीन सरकार प्रमुख शेख हसिना देश छाडेर भाग्नु परेको थियो । यदि नेपालमा पनि त्यस्तै घटनाक्रमको अपेक्षा राजावादीले गरेका छन् भने उनीहरुले बुझ्न जरुरी छ, ज्ञानेन्द्र शाहका लागि छिमेकी मुलुकको शरण पनि त्यति सहज छैन ।