केकी अधिकारी : कस्तो किताब पढ्ने ? बालाई सोध्छिन्

काठमाडौं । पुस्तक बिनाको जीवन कल्पना गर्न सक्दिनन्, नायिका केकी अधिकारी । फुर्सदको समय पुस्तकलाई साथी बनाउने गरेकी केकी दिउँसोको समय ओछ्यानमा सुतेर पढ्दा मज्जा आउने बताउँछिन् ।

कुनै पनि किताब किन्नुअघि उनी अनलाइन सर्च गर्छिन् । वेष्ट सेलरको सूची हेर्छिन् । मिडियामा छापिएको समीक्षा पढ्छिन् र पुस्तक अर्डर गर्छिन् । पुस्तकका बारेमा सुझाव लिने उनको अर्को पनि माध्यम छ, बुवा (निर्देशक बद्री अधिकार)लाई सोध्ने ।

कुनै समय आफूलाई चाहिएको किताब किन्न पसल पुग्ने गरेकी केकी अचेल किताब किन्नका लागि पसल जाँदिनन्, अनलाइन अर्डर गर्छिन् । ‘अहिले अनलाइन बजारले धेरै सजिलो भएको छ, पहिलाभन्दा’, केकीले भनिन् ।

किनेका सबै किताक उत्तिकै रुचिकर हुन्छ भन्ने छैन । कतिपय किताब पढ्दा पढ्दै दिक्क लागेर प्याक गरेर राखेकी पनि छिन् । उनको घरमा सबैभन्दा धेरै किताब किन्नेमा उनी दोस्रो व्यक्ति हुन् । उनले भन्दा धेरै किताब उनका बाले किन्ने गरेका छन् ।

कृष्ण धरावासीको राधा, बुद्धिसागरको कर्नाली ब्लुज र अमर न्यौपानेको सेतो धर्ती नेपालीले पढ्नै पर्ने पुस्तक हुन् भन्ने लाग्छ उनलाई ।