प्रधानमन्त्री ओलीले भने- प्रचण्डसँग पटकपटक सम्पर्क गर्न‍े प्रयास गरिरहेकाे छु

काठमाडौं । प्रधानमन्त्री केपी शर्मा ओलीले आफू प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग सम्पर्क गर्ने प्रयास गरिरहेको  बताएका छन् । 

प्रतिनिधिसभाको बिहीबारकाे बैठकमा ‘प्रधानमन्त्रीसँग प्रश्नोत्तर’ कार्यक्रममा प्रश्नकर्ता सांसद बिमला सुवेदीले सरकारले शान्ति प्रक्रियाको बाँकी काम टुंग्याउन के काम गरिरहेकाे छ? भन्ने  प्रश्न गरेकी थिइन्।

सांसद सुवेदीकाे प्रश्नकाे जवाफमा प्रधानमन्त्रीले शान्ति प्रक्रियाको बाँकी काम टुंग्याउने विषयमा छलफल गर्न प्रचण्डसँग पटकपटक सम्पर्कका लागि प्रयास गरिरहेको बताएका हुन्। 

 प्रधानमन्त्री ओलीले प्रचण्डसँग सम्पर्क हुनबित्तिकै काम अगाडि बढाइने बताए ।

‘बेपत्ता पारिएका व्यक्तिको छानबिन आयोग र सत्य निरुपण तथा मेलमिलाप आयोगका पदाधिकारी नियुक्ति प्रक्रिया यथाशक्य छिटो सुरु गरी शान्ति प्रक्रियाको बाँकी काम टुंग्याउन सरकार प्रतिबद्ध छ,’ उनले भने, ‘यसमा अहिले पनि म प्रयासरत छु । यसमा म विपक्षी दलका नेताज्यूसँग सम्पर्क गर्न खोजिरहेको छु । तर मैले पटकपटक प्रयास गर्दा उहाँकाे स्वास्थ्यमा केही समस्या भएकाे हुनाले सम्पर्क गर्न नसक्नुभएको भन्ने जवाफ पाएको छु । उहाँसँग सम्पर्क हुनबित्तिकै काम अगाडि बढाइन्छ ।’