आलोचना गरेर पुरानो संरचनामा बस्नुको अर्थ छैन: बाबुराम भट्टराई

सुनसरी । नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले केवल आलोचना गरेर पुरानो संरचनामा बसेर असन्तुष्ट हुनुभन्दा नयाँ शक्ति सिर्जना गर्नु नै उत्तम हुने बताएका छन् ।

सुनसरीको झुम्कामा सम्पन्न प्रदेशस्तरीय भेलामा बोल्दै भट्टराईले स्थापित शक्तिसँग सम्झौता गरेर अघि बढ्नुभन्दा शून्यबाट पुनः सुरुवात गर्ने बाटो हिँड्नु राम्रो भएको धारणा राखे ।

‘म आफैंले पनि एक विशाल परम्परागत शक्ति त्यागेर नयाँ बाटो किन रोजेँ ? मलाई थाहा छ, परिवर्तन बाहिरबाट होइन, भित्रबाट गर्नुपर्छ’, उनले भने ।

अबको समय नयाँ राजनीतिक विकल्प निर्माण गर्ने भएकाे भन्दै उनले सकेनन् भनेर चुप लागेर आलोचना गर्दै बस्नु मूर्खता भएको बताए । ‘आउनुहोस्, मिलेर जाऔँ, वैकल्पिक शक्ति निर्माण गरौँ । तपाईंहरु लागेर होइन, हातमा हात जोडेर अगाडि बढे मात्र यसको निकास निस्कनेछ’, उनले भने ।

आफ्नो पार्टीको जस्तो दस्तावेज अन्य कुनै पनि पार्टीको नभएको भन्दै उनले अन्य पार्टीहरू एउटा निश्चित समुदाय, लिंग वा वर्गसँग मात्र सम्बन्धित भएको आरोप लगाए । ‘तर हाम्रो पार्टी कुनै एक मात्र वर्ग, जाति, वा समुदायको प्रतिनिधित्व गर्ने होइन । यो सम्पूर्ण वर्ग, जाति र समुदायहरूको साझा केन्द्र हो, जहाँ सबैको समान सहभागिता हुन्छ ।’

आफ्नो पार्टी कुनै निहित स्वार्थ राखेर नबनेको दावी गरे । समावेशीता, समानता र न्यायलाई आधार बनाएर तयार पारिएको साझा फूलबारी भएको बताए । उनको भनाईअनुसार जहाँ सबै वर्गका नागरिकले आफूलाई समान रूपमा प्रतिनिधित्व भएको महसुस गर्न सक्छन् ।

अघिल्लो पुस्ताका पार्टीहरूले आफूलाई लोकतान्त्रिक भन्दै आए पनि गहिराइमा गएर हेर्दा ती पार्टीहरूका दस्तावेज, कार्यशैली र नीति बुर्जुवा सोचले ग्रस्त भएको उनको भनाई छ ।

‘परिवर्तनका लागि भन्दै आएका शक्तिहरू पनि मूलतः परम्परागत संरचनाभित्रै सीमित छन्’, उनले भने ‘अहिले संसार चौथो औद्योगिक युगमा प्रवेश गर्दैछ, जहाँ पुराना संरचनाले मात्र समाधान दिन सक्दैनन् । अबको आवश्यकता वास्तविक लोकतान्त्रिक, समावेशी, र वैज्ञानिक दृष्टिकोणबाट निर्देशित पार्टी हो र हाम्रो पार्टीले यही आवश्यकता पूरा गर्ने प्रतिबद्धता लिएको छ ।’

अब पार्टीका विधान, दस्तावेज, र प्रतिबेदनहरू केवल अतीतको गौरवगाथा गाउने खालका हुन नहुने भन्दै उनले अहिलेको जटिल सामाजिक, आर्थिक र प्रविधिगत यथार्थलाई सम्बोधन गर्ने, समाधानमुखी र भविष्यमुखी हुनु आवश्यक भएको बताए । ‘तर दुर्भाग्य, मुलधारका शीर्ष पार्टीहरूमा यस्ता व्यवहारिक, समसामयिक, र वैज्ञानिक प्रतिवेदनहरू भेट्नै मुस्किल छ’, उनले भने ।