आवासीय भत्ता नदिने मेडिकल कलेजकाे सम्बन्धन खारेज हुन सक्ने स्वास्थ्यमन्त्रीकाे चेतावनी

काठमाडौँ । स्वास्थ्य तथा जनसंख्यामन्त्री प्रदीप पौडेलले स्वास्थ्य मन्त्रालयको आठौँ तह सरह आवासीय चिकित्सकलाई भत्ता नदिने निजी मेडिकल कलेजकाे सम्बन्धन खारेज हुन सक्ने चेतावनी दिएका छन् । 

शुक्रबार मन्त्रालयमा चिकित्सक संघसँग उनीहरूका मागबारे आयोजित पत्रकार सम्मेलनमा मन्त्री पौडेलले यस्तो चेतावनी दिएका हुन्  । उनले चिकित्सा शिक्षा आयोगको माघ २५ गतेको बैठकले आवासीय चिकित्सकलाई निर्वाह भत्ता स्वरूप स्वास्थ्य मन्त्रालयको आठौँ तह सरह भत्ता दिने निर्णय गरेको र उक्त निर्णय अनिवार्य रूपमा मान्नुपर्ने बताए ।

निर्णय कार्यान्वयन नगर्ने हो भने राज्यसँगको सबै सम्बन्ध टुट्ने र सम्बन्धनसमेत खारेज हुन सक्ने चेतावनी मन्त्री पौडेलले दिए । हप्तामा ७२ घण्टा काम गर्ने, किरिया बिदा, सरकारी बिदाको व्यवस्था गर्न मन्त्रालय सकारात्मक रहेको पनि उनले बताए ।

 'चिकित्सा शिक्षा आयोगको माघ २५ गतेको बैठकले आवासीय चिकित्सकहरूलाई निर्वाह भत्ता स्वरूप स्वास्थ्य मन्त्रालयको आठौँ तह सरह  ४८ हजार ७ सय ३७ रुपैयाँ  दिने निर्णय गरेको छ ।' यो निर्णय कार्यान्वयन गर्नैपर्छ । मानेनन् भने राज्यसँगका सबै सम्बन्ध टुट्छन्, सम्बन्धन खारेज हुन्छ ।' मन्त्री पाैडेलले भने ।  

 निर्वाह भत्ता स्वरूप दिइएको रकम कुनै माया वा दयाले दिइएको नभइ चिकित्सककाे श्रमको मूल्य भएकाे उनकाे भनाई थियाे । 

केही मेडिकल कलेजले आवासिय चिकित्सकलाई काम गर्नबाटै राेकेका छन् ।