माेटरसाइकल दुर्घटनामा घाइते भएपछि साथीकै हत्या

बर्दिया । बर्दियाका एक युवाले  दुर्घटनामा परेका आफ्नै साथीको हत्या गरेका छन् । माेटरसाइल दुर्घटनामा परेका साथीकाे साथीबाटै हत्या भएकाे रहस्य हत्यामा संलग्नलाई प्रहरीले पक्राउ गरेपछि खुलेकाे हाे ।  

गत साउन १५ गते राति करिब २ बजे बर्दियाको ठाकुरबाबा नगरपालिका–९ ठाकुरद्वाराबाट हात्तीसारतर्फ जाँदै गरेको लुप्र००१–०१२ प ०८२५ नम्बरको मोटरसाइकल दुर्घटना हुँदा डोटी, शिखर नगरपालिका– ४ तिनाडी स्थायी घर ठाकुरबाबा नगरपालिका– ७ कालीगौडी बस्दै आएका करिव २० वर्षीय गोविन्द जैसी घाइते भएका थिए ।

मोटरसाइकलको पछाडि बसेका ठाकुरबाबा– ९ बेथहनी गाउँका २७ वर्षीय आशाराम थारु घटनापछि सम्पर्कविहीन भएका थिए ।

प्रहरीले घटनाको अनुसन्धानका क्रममा साउन १७ गते ठाकुरद्वाराबाट कुशलपुरतर्फ जाने सिँचाइ नालामा घोप्टो परेको अवस्थामा आशाराम थारुको शव फेला परेको थियो ।

दुर्घटनापछि घाइते अवस्थामै रहेका आशारामलाई उद्धार गर्नुको सट्टा चालक गोविन्द जैसीले निर्माणाधीन घरको सटरिङको काठ र मोटरसाइकलको चाबीले प्रहार गरी आशारामले लगाएको माला र डोरीले घाँटी थिचेर हत्या गरेको प्रहरीले जनाएको छ । हत्यापछि आशारामको शव सिँचाइ नालामा फालेर आफू त्यहाँबाट भागेका थिए ।

प्रहरीले घटनामा संलग्न गोविन्द जैसीलाई पक्राउ गरी कर्तव्य ज्यानसम्बन्धी कसुरमा मुद्दा दर्ता गरेको छ ।