कृत्रिम रुपमा लोडसेडिङ गरिएकाे थियाे अब थेग्न सक्दैन : उर्जामन्त्री

काठमाडाैं ।  उर्जा जलस्रोत तथा सिंचाइमन्त्री दीपक खड्काले भारतबाट विद्युत आयात गरेर कृत्रिम रुपमा लोडसेडिङ अन्त्य गरिए पनि अब भने थेग्न सक्ने अवस्था नरहेको बताएका छन् ।

बुधबार राष्ट्रियसभामा सांसदहरूले उठाएको प्रश्नको जवाफ दिँदै मन्त्री खड्काले अब साँझमा लोडसेडिङ हुने भन्दै उनले अब लोडसेडिङ थेग्न सकिने अवस्था नरहेकाे बताए ।

 नेपाल विद्युत प्राधिकरणका कार्यकारी निर्देशक कुलमान घिसिङकाे आलाेचना गर्दै घिसिङलाई उज्यालो नेपालको नायक भन्न नमिल्ने बताए ।

अहिले पनि ८२५ मेगावाट विद्युत भारतबाट आयात भइरहेको जनकारी दिँदै उनले नेपालसँग पुगनपुग १ हजार मेगावाट विद्युत उपलब्ध रहेकाे जानकारी दिए। 

सरकारी लगानीबाट सञ्चालित प्राधिकरणले अहिले पनि जम्मा ७०० मेगावाट विद्युत मात्र उत्पादन गरिरहेको उनकाे भनाई थियाे। 

‘सरकारको शतप्रतिशत लगानी रहेको विद्युत प्राधिकरणले ७०० मेगावाट मात्रै उत्पादन गरेको छ। २८०० मेगावाट विद्युत निजी क्षेत्रले उत्पादन गरेको छ। आज पनि विद्युत आपुर्ति हुन सकेको छैन। हिजो पनि लोडसेडिङ थियो, आज पनि छ,' उनले भने । 

नेपाल विद्युत प्राधिकरण नाफामा गएको भनेर झुक्याइएको उनको दाबी छ। उनले प्राधिकरण नाफामा गएको कुरामा सत्यता नभएको पनि बताए।