चापागाउँमा ट्रक र मोटरसाइकल ठोकिँदा युवकको मृत्यु

काठमाडाैं ।  ललितपुरको चापागाउँमा बुधबार बिहान ट्रक र मोटरसाइकल ठोकिँदा युवकको मृत्यु भएको छ। 

प्रहरीका अनुसार ललितपुर महानगरपालिका-१५, चापागाउँ दोबाटोस्थित सडकमा ना.३ ख ४७४५ नम्बरको ट्रक र बा.प्र ०२-०१९ प ६६८७ नम्बरको मोटरसाइकल बुधबार बिहान एकआपसमा ठाेकिएकाे थियाे । 

दुर्घटनामा मोटरसाइकल चालक काठमाडौँको कीर्तिपुर नगरपालिका-५ भत्केको पाटी घर भएका २२ वर्षीय सुशान्त बस्नेतको मृत्यु भएको ललितपुर प्रहरीले जानकारी दिएको छ। 

दुर्घटनामा परी गम्भीर घाइते भएका उनको उपचारका क्रममा पाटन स्वास्थ्य विज्ञान प्रतिष्ठानमा मृत्यु भएको हो।

ट्रक चालकलाई प्रहरीले नियन्त्रणमा लिएको छ।