रौतहटमा महिलाको विभत्स हत्या : परिवारका सबै सदस्य गायव

रौतहट । रौतहटमा २५ वर्षीया एक महिलाको विभत्स हत्या भएको छ । हत्यापछि गाडिएको अवस्थामा प्रहरीले शव बरामद गरेको छ । महिलाको हत्यापछि परिवारका सबै सदस्य सम्पर्कविहिन भएका छन् ।

वृन्दावन नगरपालिका–९ भुसाहा निवासी महमद शेख आदिलकी २५ वर्षीया श्रीमती तरिमा खातुनको हत्यापछि खाडलमा गाडिएको अवस्थामा शव बरामद भएको जिल्ला प्रहरी कार्यालय रौतहटले जनाएको छ ।  

प्रहरीले खातुनको सोमबार राति नै हत्या भएको अनुमान गरेको छ । मृतक महिलाका पति रोजगारीको लागि साउदी अरबमा छन् ।

घटनाको खबरपछि मंगलबार इलाका प्रहरी कार्यालय गरुडा र जिल्ला प्रहरी कार्यालय रौतहटको संयुक्त टोली घटनास्थलमा पुगेको थियो ।

खातुनको टाउको र खुट्टामा गहिरो चोट लागेको छ । घटनापछि खातुनका ससुरा शेख अलि मोहम्मदसहित परिवारका सबै सदस्य फरार छन् । खातुनका डेढ वर्षीय छोरा मोहम्मद आरिफलाई समेत परिवारका सदस्यले लिएर हिँडेको आशंका गरिएको छ ।