१४ किलो सुनसहित एअरपोर्टबाट पक्राउ परेकी नायिका को हुन् ?

कन्नड तथा तमिल फिल्मकी अभिनेत्री रान्या रावलाई दुबईबाट फर्किने क्रममा १४ किलो ८ सय ग्राम सुनसहित राजस्व गुप्तचर विभागले पक्राउ गरेको छ ।

यो सुनको मूल्य करिब १९ करोड रुपैयाँ रहेको बताइएको छ ।

अभिनेत्री रान्या राव एक आइपीएर अफिसरकी छोरी हुन् जो कर्नाटकको पुलिस महानिदेशकको रूपमा कार्यरत छन् ।

रान्या राव सुन लिएर मंगलबार बेंगलुरुको केम्पेगौडा अन्तर्राष्ट्रिय विमानस्थल पुगेका थिइन्

राजस्व गुप्तचर विभाग (डीआरआई) ले बुधबार जारी गरेको विज्ञप्तिमा भनिएको छ, ‘उनको शरीरमा सुनका बारहरू निकै चलाखीपूर्वक लुकाइएको थियो ।’

सुनको डण्डी विशेष प्रकारको बेल्टमा लुकाइएको थियो, जुन उनको शरीरमा बाँधिएको थियो । साथै उनीहरुको साथबाट ८ सय ग्राम सुनका गरगहना समेत बरामद भएको छ ।

विमानस्थलमा उनलाई पक्राउ गरेपछि डीआरआईका अधिकारीहरूले उनको घरमा पनि खानतलासी गरेका थिए ।

खान तलासीका क्रममा उनको घरबाट २ करोड ६७ लाख रुपैयाँ बराबरको सुनका गरगहना र ४ करोड २७ लाख रुपैयाँ नगद बरामद भएको छ ।

डीआरआईले भन्यो, ‘महिला यात्रुलाई भन्सार ऐन १९६२ अन्तर्गत पक्राउ गरी न्यायिक हिरासतमा पठाइएको छ ।’

यस मामिलामा कुल २७.६६ करोड रुपैयाँ जफत गरिएको छ । सुन तस्करका लागि यो ठूलो रकम हो ।

डीआरआईले दावी गरेको छ कि १४.८ केजी सुन यो बरामद बेंगलुरु अन्तर्राष्ट्रिय एयरपोर्टमा हालैको सबैभन्दा ठूलो बरामद हो ।

को हुन रान्या ?

३२ वर्षीया अभिनेत्री रान्या राव करिब १० वर्षअघि कन्नड फिल्म ‘मानिक्य’ मा कन्नड अभिनेता सुदीपसँग देखिएकी थिइन् । यो फिल्मबाट रान्याले आफ्नो पहिचान बनाएकी छिन् ।

त्यसको दुई वर्षपछि उनले विक्रम प्रभुको अपोजिट तमिल फिल्म ‘वागाह’ मा काम गरिन् । सन् २०१७ मा उनले कन्नड फिल्म ‘पटाकी’ मा चर्चित अभिनेता गणेशसँग मुख्य भूमिका निर्वाह गरेकी थिइन् ।

पत्रकारबाट चलचित्र निर्माता बनेकी सुनैना सुरेशले बीबीसी हिन्दीसंग कुरा गर्दै भनिन् ‘उनी पछिल्ला केही वर्षदेखि चलचित्र क्षेत्रमा सक्रिय छैनन् । तर उनले काम गरेका चलचित्रहरूमा महत्वपूर्ण भूमिका निर्वाह गरेका छन् ।’

कन्नड फिल्म उद्योगका अर्का एक सदस्यले नाम न छाप्ने सर्तमा रान्याले इन्जिनियरिङ पढेर फिल्म क्षेत्रमा प्रवेश गरेको बताए ।

रान्या राव कर्नाटकको चिक्कमगालुरु जिल्लाकी बासिन्दा हुन् । उनकी आमा कफी खेती गर्ने परिवारकी हुन्, र उनका बुबा रामचन्द्र राव कर्नाटक पुलिस हाउसिङ कर्पोरेशनका प्रमुख रहेका छन् ।

रामचन्द्र रावले रान्याको गतिविधिसँग आफ्नो कुनै सम्बन्ध नभएको र छोरी र ज्वाइँको व्यापारबारे कुनै जानकारी नभएको स्थानीय पत्रिकालाई बताए ।

रान्याको विवाह चार महिनाअघि भएको बताइएको छ ।

प्रहरी अधिकारीहरुबाट प्राप्त जानकारी अनुसार रान्या राव बारम्बार दुबई जाने गरेका कारण डीआरआईको रडारमा थिइन् ।

पछिल्ला पन्ध्र दिनमा चार पटक दुबई पुगेपछि उनीमाथिको शंका झनै बढ्यो ।

बाँकी यात्रुहरूले अध्यागमन प्रक्रियाबाट बाहिरिँदा रान्या राव जाँच नगरी विमानस्थलबाट बाहिर निस्केको बताइएको छ ।

उनले एयरपोर्टमा आफू डीजीपीकी छोरी भएको दाबी गर्थिन् र आफ्नो परिचय प्रमाणित गर्न एक प्रोटोकल कन्स्टेबल सधैं उनीसँगै हुन्थे ।

एक वरिष्ठ अधिकारीले प्रोटोकल कन्स्टेबल वा अफिसरलाई दोष दिनु गलत हुने बताए ।