- असार ०६, २०८०
समयआवाज संवाददाता
सांकेतिक तस्बिर
वीरगञ्ज। नेपाली कांग्रेसका उपसभापति पूर्णबहादुर खड्काले नेपाली कांग्रेसले गरेका काम जनतामाझ पुर्याउन चुकेको बताएका छन्।
नेपाली कांग्रेस नीति, अनुसन्धान तथा प्रशिक्षण प्रतिष्ठानले आज यहाँ आयोजित प्रशिक्षक प्रशिक्षण कार्यक्रममा सम्बोधन गर्दै उपसभापति खड्काले नेपाली कांग्रेस नेतृत्वमा मुलुकमा भएका काम र योगदानलाई जनतामाझ पुर्याउन नसकिएको बताएका हुन्।
‘नेपाली कांग्रेस नेतृत्वमा मुलुकमा ठूला–ठूला महत्वपूर्ण काम भएका छन्। तर, हामीले गरेका कामहरुलाई जनतामाझ पुर्याउन भने सकिरहेका छैनौँ। त्यसमा हामीबाट कहीँकतै चुक भइरहेको छ,’ उनले भने, ‘हामीले प्राप्त गरेका उपलब्धि र योगदानलाई पनि जनताको बीचमा पुर्याउन सकिरहेका छैनौँ। पार्टीले सञ्चालन गरेका विभिन्न अभियान पनि मतदाता माझ पुग्न सकिरहेको छैन। यस्तो परिरिस्थतिमा तपाईंहरु प्रशिक्षकहरुले सो पुर्याउन मद्दत पुर्याउनुहुनेछ भन्ने आशा र अपेक्षा राखेको छु।’
उपसभापति खड्काले नेपाली कांग्रेसको अगुवाइमा देशका विभिन्न स्थानमा स्थापना भएका विश्वविद्यालय, भौतिक पूर्वाधार, सिँचाइलगायतका क्षेत्रमा गरेका विकासका कामलाई पनि जनतामाझ पुर्याउन नसकेको गुनासो व्यक्त गरे।
‘मुलुकमा भएका भौतिक पूर्वाधार विकासमा नेपाली कांग्रेसको भूमिका अहम् छ’, उनले भने, ‘हामीले गरेका कामलाई जनतामाझ पुर्याउनका लागि सबैले हातेमालो गरेर अघि बढ्न जरुरी छ।’ उपसभापति खड्काले सङ्घीयता र समावेशिताका मुद्दा पनि सबैतीर पुर्याउन नसकेको स्वीकार गरे।
उपसभापति खड्काले कांग्रेसले विकास निर्माणको क्षेत्रमा होस् शिक्षा, स्वास्थ्य र भौतिक पूर्वाधार निर्माणको क्षेत्रमा धेरै ठूला–ठूला नीतिगत परिवर्तन ल्याएको पनि दावी गरे।
टिप्पणीहरू: