बालेनको अंक यसरी बढाउँदैछ एमाले

काठमाडौं । ‘राजधानीको तीनकुने क्षेत्रमा प्रदर्शन गरेका राजावादीले वातावरण प्रदूषण गरेकोलगायतका विभिन्न शीर्षकमा काठमाडौँ महानगरपालिकाले पूर्वराजा ज्ञानेन्द्र शाहलाई ७ लाख ९३ हजार जरिवाना गरेछ । योचाहिँ बालेन शाहको साहसिक र हिम्मतवाला निर्णय लाग्यो । यो गणतन्त्रको तागत हो । पातलो साह वाला मेयरले बाक्लो शाह वाला पूर्वराजालाई जरिवाना तिराउन सक्छ ।’

पूर्वमन्त्रीसमेत रहेका एमाले नेता महेश बस्नेतले सामाजिक सञ्जालमा लेखे । शुक्रबार राजावादीले गरेको प्रदर्शनको क्रममा काठमाडौं महानगरपालिका क्षेत्रभित्रका तीनकुने–कोटेश्वर क्षेत्रमा आतंक मच्चाएर विभिन्न क्षेत्रमा क्षति पुर्याएपछि महानगरका मेयर बालेन शाहले आन्दोलनको निर्देशनकर्ता पूर्वराजालाई ७ लाख ९३ हजार जरिवाना तिराउने निर्णय गरेको थियो ।

महानगरपालिकाले पूर्वराजालाई हर्जाना तिराउने निर्णय गरेलगत्तै एमाले नेता बस्नेतले गणतन्त्रको तागत भन्दै लेखे तर, अन्तिम वाक्यमा आपत्तिजनक शब्दसहित । ‘पातलो साहवाला मेयरले बाक्लो शाहवाला पूर्वराजालाई जरिवाना तिराउन सक्छ ।’ ‘पातलो साहवाला’ भन्दै उनले बालेनलाई तल्लो जातको भनेर इङ्गित गरेबाट उनको चेतनाको स्तरको बारेमा थप व्याख्या गरिरहन जरुरी छैन ।

बालेनलाई निर्दलीय, संस्कारहिन, अराजकलगायत उपाधि दिने एमाले नेता एवं कार्यकर्तालाई बालेनको विषयमा भने ‘जे पनि लेख्ने’ छुट छ भनेर बुझ्नुपर्छ । जब कुनै मान्छेसँग एजेण्डा सकिन्छ, अनि उसले आलोचना गर्नका लागि जात वा रुपमा प्रवेश गर्छ । त्यसो त प्रधानमन्त्री एवं एमाले अध्यक्ष केपी शर्मा ओली आफैं बालेनसँग भिडिरहेका छन् भने महेश बस्नेतहरुले ‘जात’ का कुरा गरे भनेर आश्चर्य नमान्दा पनि हुन्छ ।

प्रधानमन्त्री ओलीका राजनीतिक सल्लाहकार एवं उपमहासचिव विष्णु रिमालले पनि त्यही दिन सामाजिक सञ्जालमा लेखेका छन्, ‘गणतन्त्रमा मात्र यस्तो सम्भव छ । महोत्तरीको एउटा सामान्य गाउँले परिवारका बालेन्द्र साहले काठमाडौंका सम्भ्रान्त परिवारका सयौं वर्ष अधिनायकी शासन सञ्चालन गर्ने शासक ज्ञानेन्द्र शाहलाई जरिवानाको पत्र काटेछन् । यो शक्ति दिन सक्ने व्यवस्थाको नाम गणतन्त्र हो ।’

गणतन्त्रकै कारण बालेनहरु शक्तिशाली भएको आशय व्यक्त गरे पनि दुवै जनाको भनाईमा एउटा समानता छ, बस्नेतले ‘पातलो साह’ लेखेका छन् भने रिमालले ‘महोत्तरीको सामान्य गाउँले’ र पूरा वाक्य पढ्दा होच्याएर बोलेको भाव प्रष्ट झल्किन्छ ।

‘कहिले सिंहदरबार जलाइदिन्छु, कहिले टुकुचामा गाडिदिन्छु’ भनेर असभ्य अभिव्यक्ति दिने बालेनलाई सामाजिक सञ्जालबाटै सभ्यता सिकाउने एमाले नेताहरुको पनि उनको सन्दर्भमा प्रकट हुने अभिव्यक्ति बालेनको भन्दा सभ्यचाहिँ हुँदैन ।

आलोचनालाई समेत गालीका रुपमा बुझ्ने प्रधानमन्त्री ओलीका लागि बालेन मात्रै यस्ता व्यक्ति हुन्- जो आलोचना कम, सिधै गाली गर्छन् । ओलीका सन्दर्भ जोडिएका बालेनका कतिपय अभिव्यक्तिमा आलोचना कम, गाली बढी हुन्छ । आफ्नो अध्यक्षलाई त्यसरी गाली गरेकाले पनि हुन सक्छ, रिमाल-बस्नेतले समुदाय र जातका कुरा गरेर एकछिनका लागि आत्मसन्तुष्टि लिएका ।

दबाबमा एमाले

सरकार सञ्चालनभन्दा पनि प्रतिपक्षी पार्टीको भूमिकामा एमालेले विषेश दख्खल हाँसिल गरेको छ । प्रतिपक्षमा हुँदा सडकदेखि सदनसम्म उधुम मच्चाउँदै आएको एमाले सरकारको नेतृत्व गर्दा भने प्रारम्भमै रक्षात्मक अवस्थामा पुग्छ ।

२०४६ देखि ०५० सम्मको एमाले र अहिले बालेनको शैली लगभग मिल्दोजुल्दो छ ‘उग्र स्वरुप’ । ऊबेला एमाले सडकका रेलिङ तोडेर आफ्नो हैसियत देखाउँथ्यो । अहिले त्यही शैली बालेनले देखाउने गरेका छन्, सामाजिक सञ्जालमार्फत ।

चुनाव सकिएलगत्तै मिसन ०८४ शीर्षकअन्तर्गत विभिन्न कार्यक्रम सुरु गरेको एमाले ०८४ मा बहुमतको दाबी गर्दै आएको छ । तर, कांग्रेस र माओवादीभन्दा पनि बालेनसँग बढी डर छ एमालेलाई ।