६० वर्ष अघि बन्द भएको कारागार अल्काट्राजको पुनः खोल्न ट्रम्पको आदेश

वासिङटन ।  अमेरिकी राष्ट्रपति डोनाल्ड ट्रम्पले आइतबार अधिकारीहरूलाई अल्काट्राज कारागार पुनर्निर्माण र पुनः खोल्न निर्देशन दिएको बताएका छन् । 

यो कुख्यात सङ्घीय कारागार क्यालिफोर्नियाको एउटा सानो टापुमा अवस्थित थियो र ६० वर्ष अघि बन्द भएको थियो ।

“पुनर्निर्माण गर्नुहोस् र अल्काट्राज खोल्नुहोस् !”, रिपब्लिकन राष्ट्रपति ट्रम्पले आफ्नो ट्रुथ सोसल प्लेटफर्ममा लेखेका छन्, “आज म कारागार ब्युरो, न्याय मन्त्रालय, एफबिआई र होमल्यान्ड सेक्युरिटीसँग मिलेर अमेरिकाका सबैभन्दा निर्दयी र हिंसात्मक अपराधीहरूलाई राख्न अल्काट्राज पर्याप्त रूपमा विस्तारित र पुनर्निर्माण गरी फेरि खोल्न निर्देशन दिँदैछु ।”

अमेरिकी कारागार ब्युरोका अनुसार अल्काट्राज मात्र २९ वर्ष खुला रहेपछि सञ्चालन खर्च उच्च भएका कारण सन् १९६३ मा बन्द भएको थियो र अहिले यसले पर्यटकीय आकर्षणकाे केन्द्रकाे रुपमा परिचित छ ।

सान फ्रान्सिस्को तटबाट दुई किलोमिटर दूरीमा अवस्थित र मात्र तीन सय ३६ कैदीको क्षमता भएको यो कारागारमा निषेध युगका माफिया नेता अल कापोन जस्ता केही प्रख्यात अपराधीहरू राखिएका थिए  ।

ट्रम्पले विशेष गरी आप्रवासीहरूद्वारा गरिएका अपराधमाथि कडा कारबाही गर्नलाई ह्वाइट हाउसमा उनको दोस्रो कार्यकालको एक प्रमुख तत्व बताएका छन् ।

“जब हामी अझ गम्भीर राष्ट्र थियौँ, विगतमा हामीले सबैभन्दा खतरनाक अपराधीहरूलाई बन्द गर्न र उनीहरूलाई हानी गर्न सक्ने कसैबाट टाढा राख्न हिचकिचाउँदैनौँ । यो यस्तै हुनुपर्छ”, ट्रम्पले आइतबार लेखेका छन्, “अब हामी यी सिरियल अपराधीहरूलाई सहन सक्दैनौँ जसले हाम्रो सडकमा फोहोर, रक्तपात र अराजकता फैलाउँछन् ।”

गम्भीर प्रस्ताव होइन 

टापु किल्ला अमेरिकी सांस्कृतिक इतिहासमा सन् १९६२ मा तीन कैदीहरू विशेष गरी फ्रान्क मोरिस भागेपछि प्रयाेग गरेको थियो । 

कारागार ब्यूरोका अनुसार यो कारागार अन्य कुनै पनि सङ्घीय कारागारभन्दा तीन गुणा बढी सञ्चालन खर्च लाग्ने भएकाले मोरिस भागेलगत्तै सन् १९६३ मार्च २१ मा यसलाई बन्द गरिएको थियो । 

अलग टापु भएकै कारण खाना, आपूर्ति, इन्धनकाे कारण महंगाे थियाे ।  यहाँसम्म कि पिउने पानी पनि हरेक हप्ता टापुमा लैजानु पर्दथ्यो ।

कारागार ब्युरोका अनुसार सञ्चालन खर्चका अतिरिक्त मर्मत र पुनःस्थापना कार्यका लागि मात्र अनुमानित ३० लाख डलरदेखि ५० लाख डलर थप आवश्यक पर्दथ्यो । 

हरेक वर्ष १० लाखभन्दा बढी आगन्तुक ल्याउँदै यो सन् १९७३ मा पर्यटक स्थलका रूपमा सर्वसाधारणका लागि फेरि खुलेको थियो ।

“यो अहिले निकै लोकप्रिय राष्ट्रिय पार्क र प्रमुख पर्यटकीय आकर्षण हो”, सान फ्रान्सिस्कोको प्रतिनिधित्व गर्ने हाउसकी पूर्व सभामुख न्यान्सी पेलोसीले सामाजिक सञ्जाल एक्समा भनिन् “राष्ट्रपतिको प्रस्ताव गम्भीर छैन ।”

ट्रम्पले विशेष गरी आप्रवासीहरूद्वारा हुने अपराधमाथि कारबाही गर्ने वाचा गरेका छन् र उनको प्रशासनले अपराधी र गिरोहका सदस्यहरू भनेका व्यक्तिहरूलाई निर्वासित गर्न १७९८ को शत्रु ऐन लागू गरेकाे छ । यो ऐन पहिले युद्धको समयमा मात्र प्रयोग गरिएको थियो । 

उनको प्रशासनले एल साल्भाडोरलाई त्यहाँ निर्वासित गरिएका दर्जनौँ आप्रवासीलाई थुन्न लाखौँ डलर भुक्तानी गरेको छ । ट्रम्पले हिंसात्मक अपराधहरूमा दोषी ठहरिएका अमेरिकी नागरिकहरूलाई मध्य अमेरिकी देशमा पठाउन खुला हुने कुरा पनि बारम्बार बताएका छन् ।

संयुक्त राष्ट्रसङ्घका विज्ञहरूले गत हप्ता अमेरिकाले निर्वासनमा परेका दुई सय ५० भन्दा बढी भेनेजुएलाली र साल्भाडोरेलीहरूलाई जानाजानी उचित प्रक्रियाको अधिकारबाट वञ्चित गरिरहेको देखिन्छ भनी बताएका थिए ।