- असार ०६, २०८०
समयआवाज संवाददाता
काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले लुटकारी दलाल दलतन्त्रका कारण मुलुक बर्बाद भइरहेको टिप्पणी गरेका छन् ।
नेताहरुको लुटतन्त्रकै कारण तेस्रो जनआन्दोलन जन्मिएको बताउँदै उनले आम जनताको शासन व्यवस्थाका लागि आन्दोलन सफल बनाउनुपर्ने बताए ।
लुटकारी दलतन्त्रविरुद्ध २४ चैतमा काठमाडौंमा हुने तेस्रो जनआन्दोलनको तयारीका लागि आज काठमाडौँको बूढानीलकण्ठमा आयोजित कार्यक्रमलाई सम्बोधन गर्दै उनले भ्रष्टाचारी, लुटेरा, दलालहरुका कारण मुलुक समृद्ध हुन नसकेको बताए ।
‘सरकार भगौडा वर्गको पक्षपोषणमा लागेको छ । नेपालमा लुटेर अकुत पैसा जम्मा गरी विदेश लैजाने, उच्च ओहदामा बसेर लुट मचाउने र नेपालको पुँजी विदेश लैजानेको सेवा गर्नमा सरकार लागेको छ,’ आजपा अध्यक्ष साहले भने, ‘लुटेराहरु जो मुलुकको आर्थिक अवस्था धरासायी बनाए सरकार त्यस्तालाई दोहोरो नागरिक्ता दिने र कानुन पनि उनीहरुकै लागि बनाएर मुलुकलाई झन धरासायी बनाउँदैछ ।’
भगौडा वर्गको पक्षपोषणमा लागेको सरकारले मुलुकलाई जोगाउन नसक्ने बताउँदै उनले मुलुक जोगाउन, देशलाई आर्थिक संकटबाट बचाउन, देशबाट दलाल दलतन्त्रको अन्त्य गर्नका लागि तेस्रो जनआन्दोलनलाई सबै एकजुट भएर लाग्नुपर्ने बताए ।
सरकार र संविधान दुबै असफल भइसकेको बताउँदै उनले वर्तमान व्यवस्थाको अन्त्य नै मुलुकमा देखिएको संकटको समाधान भएको बताए । जनताको सर्वोच्चतासहितको शासन व्यवस्था नभएसम्म मुलुक समृद्ध हुन नसकेको उनले बताए ।
देशको वर्तमाान राजनीतिक अवस्था अन्यौलग्रस्त, अस्तव्यस्त एंव संकटउन्मुख रहेकोले आम जनतामा राजनीतिप्रति विकर्षण, दल र नेताप्रति घृणा, राजनीतिक शक्तिहरूबीच टकराव, जनआक्रोशमार्फतको तीव्र धुर्वीकरणसहित अग्रगामी विचार, नेतृत्व एंव निकासको खोजीमा देश रहेको उनले बताए ।
वर्तमान सरकारको कारण आर्थिक सूचकांकहरु नकारात्मक बनेको, वैदेशिक कुटनीतिक सम्बन्धहरु अवरुद्ध भएको, कार्यसम्पादन मूल्यांकनमा प्रधानमन्त्री तथा बहुमत मन्त्रीहरू फेल भएको, ओली नेतृत्वको सरकार आफैँ जनस्तरबाट अस्वीकृत भएको बताउदै उनले सोही कारण जनतामा आक्रोश उत्पन्न भएको बताए ।
‘दलतन्त्र विरुद्धको तेस्रो जनआन्दोलन सफल पारौं !, जनताको शासनसहित समृद्धिको पथमा अघि बढौं !!’ भन्ने मुल नारासहित भएको कार्यक्रम पार्टीका नेताकार्यकर्ता, सर्वसाधारणलगायतको सहभागिता रहेको थियो ।
टिप्पणीहरू: