धनगढीमा किशोरी बलात्कार भएको भोलिपल्ट कैलालीमा बालिकामाथि सामूहिक बलात्कार

काठमाडौं । सुदूरपश्चिम प्रदेश अन्तर्गत धनगढी र कैलालीमा दुई जना बालिका बलात्कृत भएका छन् । शुक्रबार धनगढीमा विद्यालयबाट घर फर्किने क्रममा १४ वर्षीया किशोरीलाई एक युवकले जबरजस्तीकरणी गरेका थिए । 

बलात्कारमा संलग्नविरुद्ध उजुरी प्रहरीमा प्रहरीले अहिलेसम्म पक्राउ गरेको छैन । प्रहरीले खोजी कार्य जारी रहेको जनाएको छ । किशोरी बलात्कृत भएको दोस्रो दिन शनिबार कैलालीमा १३ वर्षीया बालिकामाथि सामूहिक बलात्कार भएको छ ।

मोहन्याल घर भएर बर्दगोरिया गाउँपालिका–२ को झगडपुरमा डेरा गरी बस्ने १३ वर्षीया बालिकामाथि शनिबार सामूहिक बलात्कार भएको प्रहरीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) कबिन्द्र सिंह बोहराले बालिकामाथि सामूहिक रुपमा जबरजस्तीकरणी गर्ने दुई जनालाई पक्राउ गरिएको जानकारी दिए । पक्राउ पर्नेमा बर्दगोरिया गाउँपालिका–३ बस्ने ४४ वर्षीय गोपाल विक र सोही ठाउँ बस्ने १६ वर्षीय किशोर रहेको बोहराले बताए ।

प्नहरीका अनुसार स्थानीय विद्यालयमा कक्षा ४ मा अध्ययन गर्ने उनलाई गोपाल विकले मासु पकाएर ल्याइदिनू भन्दै दिएका थिए । मासुु पकाएर विकलाई दिन उनको पसलमा पुगेका बेला पसलको कोठामा लगेर दुवै जनाले जबरजस्तीकरणी गरेको डीएसपी बोहराले बताए ।

घटनाबारे पीडितकी दिदीले आइतबार साँझ प्रहरीलाई खबर गरेकी थिइन् । इलाका प्रहरी कार्यालय बौनियाको टोलीले दुवै जनालाई पक्राउ गरेको हो । उनीहरुलाई नियन्त्रणमा राखेर थप अनुसन्धान भइरहेको प्रहरीले जनाएको छ ।