आजबाट शिक्षकहरू सरकारविरुद्ध आन्दाेलनमा

काठमाडाैं ।   विगतमा गरेका सहमति समेटेर अग्रगामी विद्यालय शिक्षा ऐन ल्याउनुपर्ने मुख्य मागसहित देशभरका सामुदायिक विद्यालयका शिक्षक बुधबारदेखि काठमाडौंकेन्द्रित आन्दोलनमा सहभागी हुने भएका छन् ।  दिउँसो १ बजेदेखि माइतीघर क्षेत्रमा आन्दोलन सुरु गर्ने शिक्षकहरुकाे याेजना रहेकाे छ ।

नेपाल शिक्षक महासंघले मंगलबार पत्रकार सम्मेलन गर्दै आन्दोलन अनिश्चितकालीन रहने जानकारी दिँदै सरकारको ध्यानाकर्षण गराएको छ । महासंघको नेतृत्वमा हुन लागेको आन्दोलनमा कम्तीमा ५० हजार शिक्षक सहभागी हुने दाबी गरिएको छ । महासंघमा आबद्ध संघ–संगठनहरूका अनुसार १० हजार उपत्यकाभित्रका तथा ४० हजार उपत्यकाबाहिरबाट आएका शिक्षक आन्दोलनमा सहभागी हुनेछन् ।

पालिका, जिल्ला र प्रदेश तहमा समेत आन्दोलन हुने र मुख्य आन्दोलन काठमाडौंकेन्द्रित रहेको महासंघका अध्यक्ष लक्ष्मीकिशोर सुवेदीले बताए । यसअघि शिक्षकहरूले २४ फागुनमा माइतीघर क्षेत्रमा जुलुस र धर्ना दिएका दिनुकाे साथै विभिन्न पार्टी कार्यालयमा समेत धर्ना दिएका थिए ।

अध्यक्ष सुवेदीले सरकारले   विद्यालय शिक्षा ऐन ल्याउन नचाहेकाले आन्दाेलन गर्न परेकाे हाे । 

यसअघि ०८० असोजमा शिक्षकको आन्दोलनले काठमाडौंका सडक तताएको थियो । त्यतिवेला देशैभरका शिक्षक विद्यालय बन्द गरेर आन्दोलनमा उत्रिएका थिए । एक सातासम्म काठमाडौंकेन्द्रित आन्दोलन चर्किएपछि ५ असोज ०८० मा शिक्षकका माग सम्बोधन गर्ने सहमति बनेको थियो । त्यसअनुसार काम नभएको महासंघको भनाइ छ ।