१३ गतेसम्म अनुदान रकम भुक्तानी नपाए उखु किसानले आन्दोलन सुरु गर्ने

काठमाडौं । नेपाल उखु उत्पादक महासंघले आगामी मंसिर १४ गतेदेखि पुनः आन्दोलन सुरु गर्ने चेतावनी दिएको छ । मंसिर १३ गतेभित्र आफूहरुले पाउनुपर्ने करिब ७५ करोड अनुदान भुक्तानी नपाएको खण्डमा र उखुको प्रतिक्विन्टल ७५० कायम नगरिएमा आन्दोलनमा उत्रिने बताएका हुन् । 

‘गत वर्ष ३५ रुपैयाँ प्रति क्विन्टलको दरले हुन आउने ७५ करोड अनुदान रकम हाम्रो बाँकी छ । त्यो अनुदान रकम यहि १३ गतेभित्र भुक्तानी गरिनुपर्छ भन्ने माग हामीले राखेका छौं,’ महेशचन्द्र यादवले भने । 

उखुको उत्पादन मूल्य लागतको आधारमा चिनीको बजार मूल्यलाई समेत दृष्टिगत गरी नेपाल सरकार, चिनी उद्योगका प्रतिनिधि र किसानका प्रतिनिधिहरु बसेर मूल्य निर्धारण गर्नुपर्ने किसानहरुको माग रहेको छ । 

उखु किसानहरुले कृषिमन्त्री डा.मदन परियारमार्फत प्रधानमन्त्री कार्यालय र अर्थ मन्त्रालयलाई पनि ज्ञापनपत्र बुझाएका छन् । उखु किसानहरुको माग पूरा नगरिए मंसिर १४ गते सर्लाहीको हरिवनमा राष्ट्रिय राजमार्ग एक घण्टा जाम गरिने र १५ गतेदेखि एक लाख किसान परिवारको प्रतिनिधित्व गर्दै सर्लाहीको हरिवनमा अनिश्चितकालीन राजमार्ग अवरुद्ध गरेर सरकारलाई मागहरु पूरा गराउन बाध्य गराइने बताइएको छ ।