कुलमानलाई हटाएकोमा सत्तारुढ कांग्रेस असन्तुष्ट

काठमाडौं । सरकारले विद्युत प्राधिकरणका कार्यकारी निर्देशक कुलमान घिसिङलाई हटाएर हितेन्द्र देव शाक्यलाई नियुक्त गरेपछि सत्तारुढ दल कांग्रेसका नेताहरुले असन्तुष्टि व्यक्त गरेका छन् ।

नेपाली कांग्रेसका नेता शेखर कोइरालाले सामाजिक सञ्जाल फेशबुकमा लेख्दै सरकारको कुशासनको अर्को कडी भनेका छन् । सरकारको यो कदमको कांग्रेसले स्वामित्त लिन नहुने उनको भनाई रहेको छ ।

नेपाली कांग्रेसका महामन्त्रीद्वय गगन थापा र विश्वप्रकाश शर्माले पनि असन्तुष्टि व्यक्त गरेका छन् । थापाले सरकारले उल्टो बाटो हिँडेको टिप्पणी गरे । मन्त्रीले बाटो बिगारे प्रधानमन्त्रीले सम्हाल्नुपर्नेमा यहाँ प्रधानमन्त्रीले नै अनुमोदन गरिदिनु गलत भएको उनको भनाइ छ । सरकारका कामका बारेमा असन्तुष्टि सलबलाइरहेको र त्यसलाई सम्बोधन गर्नुपर्नेमा सरकारले आगोमा घिउ हालेको थापको भनाइ छ ।

‘हामीले यस्तो नगरौँ है भन्दा सुनेको जस्तो पनि गर्ने तर निर्णय फेरि यस्तो गलत गर्ने ? मन्त्रीहरूले बाटो बिराउँदा प्रधानमन्त्रीले समाल्नु पर्ने हो..तर विडम्बना त्यो भएन, निर्णय गलत छ,सरकार! उल्टो बाटो हिँडेर सही गन्तव्य पुगिँदैन’, थापाले लेखेका छन् ।

त्यस्तै, महामन्त्री शर्माले भने सरकारले कुलमानलाई हटाउने निर्णय समयोचित नभएको भन्दै विमति जनाएका छन् ।

सोमबार बसेको मन्त्रिपरिषद बैठकले कुलमानलाई हटाएर शाक्यलाई नियुक्त गर्ने निर्णय गरेको थियो । प्रधानमन्त्री केपी शर्मा ओली, उर्जामन्त्री दिपक खड्का र पराराष्ट्रमन्त्रि आरजु राणाको जोडबलमा कुलमानलाई हटाउने निर्णय भएको थियो ।