रवि लामिछानेसहित १५ जनाविरुद्ध चितवनमा मुद्दा दर्ता

काठमाडाैँ। चितवनस्थित साहारा चितवन बहुउद्देश्यीय सहकारी संस्था लिमिटेडको रकम ठगी प्रकरणमा राष्ट्रिय स्वतन्त्र पार्टी (रास्वपा)का सभापति रवि लामिछानेसहित १५ जनाविरुद्ध मुद्दा दर्ता भएको छ।

सरकारी वकिल कार्यालयले पूर्वगृहमन्त्रीसमेत रहेका लामिछानेसहित १५ जना र ६ वटा संस्थाविरुद्ध मंगलबार जिल्ला अदालत चितवनमा मुद्दा दर्ता गरेकाे हाे।

रविसहित पूर्वडीआईजी छविलाल जोशी, रामबहादुर खनाल, रविना रिमाल, विशाल गुरुङ, नवीन अछामी, कविता तामाङ, दिपक लामा, असरफअलि सिद्दिकी, भगवती बम्जन, लक्ष्मीप्रसाद पौडेल, विज्ञान राई, नेत्रपाणी बास्तोला, शिवबहादुर गुरुङ र प्रगति श्रेष्ठलाई प्रतिवादी बनाइएकाे छ।

उनीहरुविरुद्ध ठगी तथा संगठित अपराध अभियोगमा मुद्दा दर्ता भएको बताइएकाे छ। उनीहरुमाथि ५६ करोड २२ लाख ५० हजार हाराहारीमा रकम बिगो कायम गरिएकाे छ।