राप्रपाले बुझायाे काठमाडौँ महानगरलाई १ लाख जरिवाना

काठमाडौं। राष्ट्रिय प्रजातन्त्र पार्टी (राप्रपा)ले काठमाडौँ महानगरपालिकालाई १ लाख रुपैयाँ जरिवाना बुझाएको छ ।

पोखराबाट काठमाडौं फर्किएका पूर्वराजा ज्ञानेन्द्र शाहको स्वागतमा आइतबार निकालिएको र्‍यालीका क्रममा फोहोर गरेबापत महानगरले तोकेको १ लाख रूपैयाँ जरिवाना राप्रपाले बुझाएको हो।

साेमबार राप्रपाका प्रमुख सचेतक ज्ञानेन्द्र शाहीले महानगर प्रहरीको टोलीलाई भेटेर जरिवाना बापतकाे रकम दाखिला गरेको हुन् ।

‘हामी राप्रपा सुशासन मान्छौं र विधिको शासन मान्छौ राजाको स्वागतमा आएका लाखौं आमाबुवा दाजुभाई बहिनीहरूले हिँड्दा बाटोमा केही कुल्चिए होलान् महानगर नगरपालिकाको निर्णयलाई हामी स्वीकार्दछौl रु १ लाख रुपैयाँ हामीले काठमाडौँ महानगरपालिकाको खातामा दाखिला गरेका छौँ’,  शाहीले सामाजिक सञ्जालमार्फत लेखेका छन् ।

पूर्वराजा शाहको स्वागतका लागि राप्रपाले आइतबार गरेकाे र्‍यालीसहितकाे प्रदर्शनका क्रममा सडकमा फोहोर र विरूवामा क्षति भएकाे भन्‍दै महानगरले १ लाख जरिवानाको निर्णय गर्दै पत्र काटेको थियो । महानगरले पत्र काटेको भोलिपल्टै राप्रपाले जरिवाना बुझाएकाे हाे।