- असार ०७, २०८०
समयआवाज संवाददाता
काठमाडौँ। त्रिभुवन अन्तर्राष्ट्रिय विमानस्थलकाे गेट अगाडि राजावादीहरुले प्रदर्शन गरेका छन्।
पूर्वराजा ज्ञानेन्द्र शाह आज पोखराबाट काठमाडाैँ आउने भएपछि र्यालीसहित पुगेका राजावादीहरुले विमानस्थलकाे गेट अगाडि प्रदर्शन गरेका हुन्।
उनीहरुले राजतन्त्रको पुनरुबहाली हुनुपर्नेलगायतका माग राख्दै प्रदर्शन गरेका छन्।
प्रदर्शनकारीले ‘राजतन्त्र जिन्दावाद’, ‘राजा आउ देश बचाउ’, ‘गणतन्त्र मुर्दाबाद’ ‘हाम्रो राजा हाम्रो देश प्यार भन्दा प्यारो छ’लगायतका नारा लगाएका छन्।
आज दिउँसो ३ बजे काठमाडौँ फर्किन लागेका पूर्वराजा शाहकाे स्वागतमा राजावादी दल र समूहहरुले र्यालीसहित प्रदर्शनको गरेका हुन् ।
राजावादीहरुको प्रदर्शनलाई मध्यनजर गर्दै विमानस्थलकाे सुरक्षा व्यवस्था कडा बनाइएको छ। विमानस्थलकाे गोल्डेन गेटबाट प्रवेशमा समेत कडा गरिएकाे छ। हवाई टिकट भएका यात्रु र स्टाफबाहेक अरूलाई विमानस्थलभित्र छिर्न राेक लगाइएको छ।
राजावादीहरुको प्रदर्शनले काेटेश्वर-गाैशाला सडकमा यातायात अवरुद्ध भएकाे छ।
पूर्वराजाको स्वागतका लागि विभिन्न ठाउँबाट निस्केकाे जुलुसले काठमाडौं उपत्यकाको सवारी आवागमन अस्तव्यस्त बनेकाे छ।
टिप्पणीहरू: