राजावादी आन्दोलनमा लुटपाट गर्ने राई र रोकाले ३ महिनाअघि नै पार्टी छाडेका थिए: रास्वपा

काठमाडाैँ । राष्ट्रिय स्वतन्त्र पार्टी (रास्वपा) ले राजावादीहरूको आन्दोलनका क्रममा चोरी र लुटपाटमा संलग्न खोटाङका डा. राजकुमार राई र भगवती रोकालगायतका व्यक्तिहरु ३ महिनाअघि नै पार्टीबाट अलग भएको बताएकाे छ ।

रास्वपाका सदस्य राजावादीहरूको आन्दोलनका क्रममा चोरी र लुटपाटमा संलग्न भनेर मिडियामा समाचार र सामाजिक सञ्जालमा आएका पोस्टप्रति पार्टीको गम्भीर ध्यानाकर्षण भएकाे भन्दै राई र रोका हाल कुनै जिम्मेवारीमा नरहेका स्पष्ट पारेकाे हाे । 

उनीहरु रास्वपाका विभिन्न महत्वपूर्ण पदमा रहेको भनी मिडियामा आएकोले उक्त कुरामा कुनै सत्यता नभएको र भ्रमपूर्ण रहेको रास्वपा संगठन विभागका सचिव शंकर श्रेष्ठले विज्ञप्तिमार्फत जानकारी दिए ।

‘कानुन उल्लंघन गर्ने जो सुकै मानिस कानुनको दायरामा आउनुपर्ने र हाम्रो पार्टीभित्रका पनि चाहे जुनसुकै पद र मर्यादामा बसेका भए पनि पार्टीको तर्फबाट कानुनलाई पूर्ण सहयोग हुने कुरामा पार्टी प्रतिबद्ध रहेको कुरा सबैमा जानकारी गराइन्छ’, रास्वपाले भनेकाे छ ।