केपी ओलीको प्रशंसा गरेदेखि गाली खाएको खायै प्रकाश सपुत

काठमाडाैँ । प्रधानमन्त्री केपी शर्मा ओलीको प्रशंसा गरेको दिनदेखि प्रसंशकहरुले गायक प्रकाश सपुतको खेदो खनिरहेका छन् ।

काठमाडौं । एउटा सार्वजनिक कार्यक्रममा प्रधानमन्त्री केपी शर्मा ओलीको प्रशंसा गरेका गायक तथा नायक प्रकाश सुपुतले त्यसपछि लगातार गाली गाएको खायै छन् । दुई साता बित्यो तर, पनि रिसाएका उनका प्रशंसक अझै शान्त भएका छैनन् ।

आफ्ना प्रिय दर्शकको गाली खाँदाखाँदैकाे समयमा प्रकाशले आफ्नै अभिनय र निर्देशन रहेको चलचित्र ‘वसन्त’को ट्रेलेर रिलिज गरेका छन् । ट्रेलरको लिंक शेयर गर्दै प्रकाशले लेखेका छन् ‘एउटा सर्जकका लागि सिर्जना नै उसको आवाज हो ! आन्दोलन हो ! पहिचान हो । म एउटा स्वतन्त्र सर्जक हुँ र मेरो सिर्जना नै मेरो शक्ति हो ! मेरो पहिचान हो । म आज जे छु आफ्नै संघर्षले, आफ्नै बलबुताले र आफ्नै सिर्जनाहरुले छु ।’

उनले आफू यो स्थानमा आउनुको कारण नै दर्शकको माया भएको दाबी पनि गरेका छन् । ‘तपाईंहरुको माया, आशीर्वाद र शुभेच्छाले छु । यदि मेरा सिर्जनाले तपाईंहरुलाई छुन सक्यो भने मात्रै म शक्तिशाली हुने हो, मेरो पहिचान हुने हो नत्र म केही होइन, कोही होइन,’ उनले भनेका छन् ।

चरम अभाव र संघर्षको बेला त कुनै शक्तिको पछि नलागिएकाे भन्दै उनले स्वतन्त्र र स्वाभिमानी भएर संघर्ष गरेको उल्लेख गरेका छन् । ‘अब त झन मेरा सिर्जनाहरु नै शक्तिशाली छन्, आफ्नो पहिचान नै शक्तिशाली छ ! अब अरु कुनै शक्तिको झोला बोक्नुपर्ने कुनै बाध्यता छैन । मेरो आफ्नै झोला गह्रुँगाे छ । त्यो झोलामा कथाहरु छन्, भाकाहरु छन् । राज्यलाई प्रश्नहरु छन् । मेरो आफ्नै झोलाको भारी पुग्दो छ मलाई ।’

उनले अगाडि भनेका छन्, ‘ठिक छ, प्रकाश सपुतसँगका सबै गुनासो, चित्त दुखाई र रिसहरुको हिसाब राख्नु होला । एक एक हिसाब राख्नु होला । अलिक समयमा त्यो हिसाबको व्याजसहित असुल उपर गरौँला । जवाफ खोजौँला । जवाफ चित्त नबुझे मनबाटै मिल्काइदिउँला ।’

आफ्ना सिर्जनामा प्रायोजित शक्तिहरुको गन्ध आयो भनेर गरेको टिप्पणीका सन्दर्भमा कतिपयले फिल्म बहिस्कार गर्नुपर्ने तर्कप्रति असहमति जनाउँदै उनले भनेका छन्, ‘तपाईंहरु भनिरहनु भाछ नि बहिस्कार, हो बहिस्कार नै गरौँला तर अहिलेलाई धेरै जनाले आफ्नो तन, मन, धन लगाएर बनाएको यो विचरा ‘बसन्त’ माथि कुनै प्रतिशाेध नसाँध्नु होला । एउटा इमानदार प्रयास माथि अन्याय नगरिदिनु होला ।’

किन यति धेरै आलोचित

पत्रकार गणेश पाण्डेले केपी ओलीमाथि लेखेको पुस्तक ‘केपी ओली सपना, संघर्ष र संकल्प’ को फागुन १९ गते राष्ट्रियसभा गृहमा भव्य कार्यक्रम गरेर सार्वजनिक गरिएको थियो । सोही कार्यक्रममा अतिथिका रुपमा पुगेका प्रकाशले ओलीको काफी प्रशंसा गरेका थिए । सोही कार्यक्रममा उनले आफूसहित केपी ओली र पत्रकार गणेश पाण्डेलाई बहुप्रतिभाशाली भनेर व्याख्या गरे । त्यति मात्रै होइन, उनले ‘हामीलाई ताली बजाएर स्वागत गर्नुस्’ पनि भने । शायद उनीबाट यस किसिमको अपेक्षा गरेका थिएनन् दर्शकले ।

प्रधानमन्त्री भएर पनि प्रभावकारी भूमिका निर्वाह गर्न नसकेका ओलीमाथि आफ्नै पार्टीका कार्यकर्तासमेतले प्रश्न गरिरहेको बेला प्रकाशले यति धेरै प्रशंसा गरिदिए । दर्शक त्यही कुरमा बिच्किए । ओलीलाई गणतन्त्रका पर्यावाची र सपनाका खानीजस्ता उपाधि दिएका प्रकाशले कम्युनिष्टको झण्डा हँसिया हथौडा र एमालेको चुनाव चिन्ह सूर्यको समेत प्रशंसा गरिदिए ।

यो रोष ओलीप्रति कि प्रकाशप्रति ?

दुई सातादेखि सामाजिक सञ्जालमा गाली खाइरहेका प्रकाशलाई लाग्दो हो, ‘मेरा प्रशंसकले मेरो उछित्तो काढिरहेका छन् ।’ यो रोष केबल प्रकाशप्रति मात्रै होइन, प्रधानमन्त्री ओलीप्रति पनि हो ।

‘म आफू पनि भ्रष्टाचार गर्दिनँ र अरुलाई पनि गर्न दिन्नँ’ भन्ने ओलीले कतिपय घटनामा भ्रष्टाचारमा संलग्नलाई चोख्याउने प्रयत्न गरेपछि आम सर्वसाधारण रुष्ट छन् । यही घानमा परेका हुन्, प्रकाश सपुत ।